ओमानका लागि प्रस्तावित राजदूत राणाको कार्ययोजना : श्रम, आर्थिक र जलवायु कूटनीतिमा जोड

काठमाडौं । ओमानका लागि प्रस्तावित नेपाली राजदूत पदमाक्षी राणाले नेपाल र ओमानबीचको सम्बन्ध थप सुदृढ बनाउन चारवर्षीय रणनीतिक कार्ययोजना प्रस्तुत गर्नुभएको छ । मंगलबार संसदीय सुनुवाइ समितिमा आफ्नो कार्ययोजना प्रस्तुत गर्दै उहाँले श्रम कूटनीति, आर्थिक साझेदारी र जलवायु कूटनीतिलाई कार्यकालका मुख्य प्राथमिकताका रूपमा अघि सार्नुभएको हो । समितिको बैठकमा प्रस्तावित राजदूत राणाले नेपाल र ओमानबीच सन् १९७७ मा कूटनीतिक सम्बन्ध स्थापना भएदेखि नै श्रम आप्रवासन दुई देशबीचको सम्बन्धको महत्त्वपूर्ण आधार रहँदै आएको उल्लेख गर्नुभयो । परराष्ट्र मन्त्रालयको तथ्यांकअनुसार हाल करिब २५ हजार नेपाली ओमानमा कार्यरत छन् । उहाँले आफ्नो कार्यकालमा नेपाली श्रमिकको हकहित, सुरक्षा र सीप विकासलाई उच्च प्राथमिकता दिने प्रतिबद्धता जनाउनुभयो । राणाले ओमानको ‘भिजन २०४०’ सँग नेपालको प्राथमिकतालाई जोड्दै आर्थिक कूटनीतिलाई अघि बढाउने योजना पनि प्रस्तुत गर्नुभयो । कृषि, पर्यटन, नवीकरणीय ऊर्जा तथा नेपालमा वैदेशिक लगानी भित्र्याउने क्षेत्रमा सहकार्य विस्तार गर्ने उहाँको योजना छ । त्यसैगरी, उहाँले जलवायु कूटनीतिलाई कार्ययोजनाको तेस्रो प्रमुख आधारका रूपमा प्रस्तुत गर्नुभयो । ओमानले जलस्रोत व्यवस्थापन र हरित ऊर्जाका क्षेत्रमा गरिरहेका काम नेपालका लागि उपयोगी हुन सक्ने उल्लेख गर्दै उहाँले जलवायु परिवर्तनको असर न्यूनीकरण तथा विपद् व्यवस्थापनमा दुवै देशबीच सहकार्य विस्तार गर्न सकिने बताउनुभयो । राणाले चारवर्षीय कार्ययोजनालाई चरणबद्ध रूपमा कार्यान्वयन गर्ने प्रस्ताव गर्नुभएको छ । जसअनुसार सन् २०२७ सम्म आधार तयार पार्ने, २०२८ मा साझेदारी विस्तार गर्ने, २०२९ मा सम्भावनायुक्त क्षेत्रमा काम गर्ने र २०३० सम्म प्राप्त उपलब्धिलाई दिगो बनाउने लक्ष्य राखिएको छ । प्रस्तावित कार्ययोजनामार्फत नेपाली श्रमिकको हित संरक्षण, आर्थिक सहकार्य विस्तार र जलवायु परिवर्तनका चुनौती सामना गर्न नेपाल–ओमान सम्बन्धलाई थप प्रभावकारी बनाउने लक्ष्य उहाँले अघि सार्नुभएको छ ।