मधेस सरकारबाट एमाले बाहिरियो, चार मन्त्रीले दिए राजीनामा

काठमाडौं । नेकपा एमाले मधेस प्रदेश सरकारबाट बाहिरिएको छ। एमालेबाट प्रदेश सरकारमा सहभागी चार मन्त्रीले शुक्रबार मुख्यमन्त्री कृष्णप्रसाद यादवसमक्ष राजीनामा बुझाउँदै सरकारलाई दिएको समर्थनसमेत फिर्ता लिएका छन्। एमालेका मन्त्रीहरूले मुख्यमन्त्री यादवलाई राजीनामापत्र बुझाउनुका साथै प्रदेश प्रमुख डा. सुरेन्द्र लाभसमक्ष सरकारलाई दिएको समर्थन फिर्ता लिएको पत्रसमेत बुझाएका हुन्। राजीनामा दिनेमा श्रम तथा यातायातमन्त्री शारदादेवी थापा, खेलकुद तथा समाजकल्याणमन्त्री लखनदास, भौतिक पूर्वाधार विकासमन्त्री मोहम्मद समिर र शिक्षा तथा संस्कृतिमन्त्री मनोजकुमार सिंह रहेका छन्। मधेस प्रदेशमा नेपाली कांग्रेसका कृष्णप्रसाद यादव मुख्यमन्त्री हुनुहुन्छ। प्रदेश सरकारमा नेपाली कम्युनिस्ट पार्टी पनि गठबन्धनमा सहभागी छ। एमालेले सरकार गठनका बेला भएको सहमतिअनुसार मुख्यमन्त्रीले काम नगरेको र चालु आर्थिक वर्षको बजेट निर्माणमा कांग्रेसले एकपक्षीय ढंगले योजना समावेश गरेको आरोप लगाएको छ। एमालेका मधेस प्रदेश प्रमुख सचेतक हरिनारायण महतोले सरकार गठनका बेला १५ बुँदे सहमति भएको स्मरण गराउँदै सहमतिअनुसार काम नभएका कारण सरकारमा बसिरहन नसकिएको बताउनुभयो। उहाँले चालु आर्थिक वर्षको बजेटमा कांग्रेसले एकपक्षीय रूपमा योजना समावेश गरेको भन्दै एमालेले असन्तुष्टि जनाउँदै आएको जानकारी दिनुभयो। सरकारबाट बाहिरिएपछि नयाँ सरकार गठनका विषयमा थप छलफल गरेर अघि बढ्ने महतोले बताउनुभयो। उहाँका अनुसार मुख्यमन्त्रीले ३० दिनभित्र विश्वासको मत प्राप्त गर्न नसकेमा अन्य कुनै दलसँग सहकार्य गरेर सरकार गठनको प्रक्रिया अघि बढाइनेछ। एमाले सरकारबाट बाहिरिएसँगै मधेस प्रदेशको सत्ता समीकरणमा फेरबदल आउने देखिएको छ। अब प्रदेशमा नयाँ सरकार गठनका लागि दलहरूबीचको छलफल र सहकार्य निर्णायक हुने देखिन्छ।