२५ विपन्न परिवारलाई खाद्यान्न र नगद सहयोग

काठमाडाैं । नेपालीहरूको महान् चाड विजयादशमीको फूलपातीका दिन युवामान नेपाल प्रालिको सहकार्यमा २५ अति विपन्न, असहाय तथा अपाङ्गता भएका परिवारलाई खाद्यान्न सामग्री र नगद सहयोग वितरण गरिएको छ । सोही अवसरमा समाजसेवी अगम गुरुङ, प्रेम परियार तथा गायक डम्बर नेपालीलाई समाजमा पुर्‍याएको योगदानको कदर गर्दै सम्मानपत्रसहित सम्मान गरिएको छ । विभिन्न देश तथा विदेशमा रहेका समाजसेवी व्यक्तित्वहरूको आर्थिक सहयोग र युवामान नेपाल प्रालिको सहकार्यमा आयोजित कार्यक्रममा २५ परिवारलाई खाद्यान्न सामग्रीसँगै प्रतिपरिवार ५०० रुपैयाँका दरले नगद सहयोग प्रदान गरिएको हो । चाडपर्वको समयमा आर्थिक अभावका कारण समस्यामा परेका परिवारलाई राहत पुर्‍याउँदै दसैँको खुसी बाँड्ने उद्देश्यले कार्यक्रम आयोजना गरिएको आयोजकले जनाएको छ । कार्यक्रममा सानु लिम्बू, राम धमला, प्रेम परियार, गुराँस बल, फूल तामाङ, आयन राई, अर्जुन प्रधान, श्रेया बल र अन्सा बललगायतका समाजसेवी व्यक्तित्वहरूले आर्थिक सहयोग गरेका थिए । विभिन्न स्थान तथा विदेशमा रहेर पनि विपन्न र असहाय परिवारको सहयोगका लागि हातेमालो गर्ने सहयोगदाताहरूको योगदानले सामाजिक सेवामा सहकार्य र मानवीय भावनाको महत्त्वलाई उजागर गरेको छ । कार्यक्रममा युवामान नेपाल प्रालिका अध्यक्ष किशोर श्रेष्ठले समाजसेवी अगम गुरुङ, प्रेम परियार तथा गायक डम्बर नेपालीले समाजमा पुर्‍याउँदै आएको योगदानको प्रशंसा गर्दै विशेष धन्यवाद व्यक्त गरे । समाजका लागि निःस्वार्थ भावनाले काम गर्ने व्यक्तित्वहरूको योगदानको कदर र सम्मान गर्न आवश्यक रहेको उनले बताए । श्रेष्ठले चाडपर्वको खुसी सबै परिवारसम्म पुर्‍याउन सामाजिक सहयोग महत्त्वपूर्ण हुने उल्लेख गर्दै सहयोग अभियानमा साथ दिने सम्पूर्ण समाजसेवी तथा दाताहरूप्रति आभार व्यक्त गरे । सामाजिक उत्तरदायित्वलाई आत्मसात् गर्दै विपन्न तथा असहाय नागरिकलाई सहयोग गर्ने अभियानलाई निरन्तरता दिनुपर्नेमा समेत उनले जोड दिए । कार्यक्रमका प्रमुख अतिथि उर्लाबारी नगरपालिकाका मेयर गंगाप्रसाद खरेल रहेका थिए भने विशिष्ट अतिथिका रूपमा समाजसेवी तथा युवा व्यवसायी सचिन शाक्यको उपस्थिति रहेको थियो । कार्यक्रमको सञ्चालन घनश्याम भण्डारीले गरेका थिए । फूलपातीको अवसरमा आयोजित यस कार्यक्रमले आर्थिक रूपमा कमजोर परिवारलाई चाडपर्व मनाउन सहयोग पुर्‍याउनुका साथै समाजसेवामा सक्रिय व्यक्तित्वहरूको योगदानको कदर गरेको छ । खाद्यान्न तथा नगद सहयोग वितरण र सम्मानपत्र प्रदानमार्फत समाजमा सहयोग, सद्भाव र मानवीय सेवाको भावना अभिवृद्धि गर्ने प्रयास गरिएको छ । यस्ता सामाजिक अभियानले चाडपर्वको खुसी विपन्न परिवारसँग बाँड्नुका साथै समाजमा सकारात्मक परिवर्तनका लागि व्यक्ति, संस्था र सहयोगदाताबीच सहकार्यको वातावरण निर्माण गर्न महत्त्वपूर्ण भूमिका खेल्ने अपेक्षा गरिएको छ ।