१३औं छायाँछवि तीज म्युजिक अवार्डका विजेतालाई ट्रफी प्रदान

काठमाडौं । छायाँछवि क्रियशनले १३औं संस्करणको ‘छायाँछवि तीज म्युजिक अवार्ड’का विजेताहरूलाई ट्रफी प्रदान गरेको छ । गत भदौ १० गते रसुवाको भोटेकोशीमा आएको बाढी तथा देशको असहज परिस्थितिका कारण अवार्डको औपचारिक समारोह स्थगित गरिएकोमा आयोजकले विजेताहरूलाई ट्रफी हस्तान्तरण गरेको हो । छायाँछविका अध्यक्ष शान्तिप्रियले प्राकृतिक प्रकोप र देशको परिस्थितिका कारण निर्धारित समयमा अवार्ड वितरण कार्यक्रम गर्न नसकिएको बताउनुभयो । उहाँले आगामी संस्करणका अवार्ड कार्यक्रम भने निर्धारित समयमै आयोजना गर्ने प्रतिबद्धता व्यक्त गर्नुभयो । विजेताहरूलाई अभिनेत्री वसुन्धरा भुसाल, चलचित्र पत्रकार विजयरत्न तुलाधर, नेपाल चलचित्र कलाकार संघका अध्यक्ष उत्तम केसी, परिवर्तन नेपालका अध्यक्ष मोहन निरौला तथा संस्कृतिकर्मी आरसी कोइरालाले ट्रफी प्रदान गर्नुभएको थियो । अवार्डअन्तर्गत ‘छमछम नाचिदेउ’बाट प्रकाश मिश्रले सर्वोत्कृष्ट तीज गीत मिक्सिङ र ‘छमछमी नाँचौं न’बाट विपिन आचार्यले सर्वोत्कृष्ट तीज गीत एरेञ्जरको अवार्ड प्राप्त गर्नुभयो । ‘मेरो माया जुनीभरिलाई’बाट आशा कार्कीले सर्वोत्कृष्ट तीज गीत मोडल नवप्रतिभा तथा सुमन सागरजंग केसीले सर्वोत्कृष्ट तीज गीत मोडल पुरुषको अवार्ड हात पार्नुभयो । त्यस्तै, ‘माईतीघरको आँगन’बाट झरना रिसाल सर्वोत्कृष्ट तीज गीत मोडल महिला घोषित हुनुभयो । ‘लाली लपक्कै’बाट गम्भीर विष्टले सर्वोत्कृष्ट तीज गीत भिडियो निर्देशकको अवार्ड पाउँदा ‘नौरति फूली’बाट दीपक शर्माले सर्वोत्कृष्ट तीज गीत शब्दको अवार्ड प्राप्त गर्नुभयो । ‘जन्मेर हुर्केको घर’बाट मनु पन्तले सर्वोत्कृष्ट तीज गीत लय र ‘रानीहार’बाट शंकर थापा स्माइलले सर्वोत्कृष्ट मौलिक तीज गीत लयको अवार्ड जित्नुभयो । त्यसैगरी, ‘लाली लपक्कै’बाट निशा सुनार सर्वोत्कृष्ट दोहोरी तीज गीत गायिका र प्रकाश सपुत सर्वोत्कृष्ट दोहोरी तीज गीत गायक घोषित हुनुभयो । ‘भिजायो फरिया बर्खैले’बाट सरिता भारतीले सर्वोत्कृष्ट तीज गीत गायिका, ‘नक्कल पार्ने बानी’बाट गंगा गौतमले सर्वोत्कृष्ट मौलिक तीज गीत गायिका तथा ‘एक वर्षमा एक चोटी’बाट अञ्जु श्रेष्ठले सर्वोत्कृष्ट तीज गीतको अवार्ड प्राप्त गर्नुभयो। ‘ह्वीस्की फोरिन्छ’बाट रश्मी पाण्डेले सर्वोत्कृष्ट तीज गीत जुरी अवार्ड पाउनुभयो । कार्यक्रममा गायिका सहिमा श्रेष्ठ, गीतकार नारायण कँडेल तथा ब्युटीसियनद्वय चाँदनी श्रेष्ठ र स्मृति सुब्बालाई सम्मानसमेत गरिएको थियो ।