काठमाडौं।नेपाल प्रिमियर लिग (एनपीएल) को तेस्रो संस्करणमा सुदूरपश्चिम रोयल्सले जनकपुर बोल्ट्सलाई २७ रनले पराजित गरेको छ। मंगलबार राति कीर्तिपुरस्थित त्रिवि क्रिकेट मैदानमा भएको खेलमा सुदूरपश्चिमले दिएको १२१ रनको लक्ष्य पछ्याएको जनकपुर ९३ रनमै समेटियो। १२१ रनको सामान्य लक्ष्य पछ्याउने क्रममा जनकपुरले ब्याटिङमा अपेक्षित प्रदर्शन गर्न सकेन। टोलीले १९.५ ओभरमा सबै विकेट गुमाउँदै ९३ रन मात्र जोड्यो। जनकपुरका त्रितराज दासले सर्वाधिक २१ र जिमी निसामले २० रन बनाए। अन्य ब्याट्सम्यानले उल्लेखनीय योगदान दिन सकेनन्। सुदूरपश्चिमका स्कट कुगेलेइनले उत्कृष्ट बलिङ गर्दै १३ रन खर्चिएर ३ विकेट लिए। हेमन्त धामी, थारिन्दु रत्नायाके, दीपेन्द्रसिंह ऐरी, अनिल खरेल र इशान पाण्डेले समान एक विकेट हात पारे। यसअघि टस जितेर पहिले ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १२० रन बनाएको थियो। उसका ब्रान्डन म्याकमुलेनले २३ बलमा २ चौका र २ छक्कासहित ३३ रन जोडे। थारिन्दु रत्नायाके २७ रनमा अविजित रहँदा आरिफ शेखले ११ तथा सैफ जैब र विनोद भण्डारीले समान १० रन बनाए। जनकपुरका हर्मित सिंहले उत्कृष्ट बलिङ गर्दै १७ रन दिएर ४ विकेट लिए। ह्यारी टेक्टर, राहुल यादव, आदित्य महता र अभिषेक तिवारीले समान एक विकेट लिए। यस जितसँगै ६ खेलबाट ८ अंक जोडेको सुदूरपश्चिम अंकतालिकाको दोस्रो स्थानमा उक्लिएको छ। समान खेल खेलेको जनकपुर ४ अंकसहित पाँचौं स्थानमा छ।
सुदूरपश्चिमको बलियो बलिङसामु जनकपुर निरीह, २७ रनको जित
Read Complete Original Article
Published originally on नेपालन्युज
