साहित्यकार रमेश विकललाई सम्झँदै मनाइयो ९९औँ जयन्ती

काठमाडौँ। रमेश विकल साहित्य प्रतिष्ठानको प्राङ्गण, आरुबारीमा साहित्यकार रमेश विकलको ९९औँ जयन्ती मनाइएको छ। विकल चोकमा रहेको रमेश विकलको अर्धकदको प्रतिमामा माल्यार्पण गरेपछि प्रतिष्ठानको भवनमा संक्षिप्त स्मृति सभा आयोजना गरिएको थियो। काठमाडौँको उत्तरपूर्वी क्षेत्रका साहित्यकार, प्राध्यापक, समाजसेवी तथा स्थानीयवासीको उपस्थितिमा सम्पन्न सभालाई सम्बोधन गर्दै प्रमुख अतिथि गोकर्णेश्वर नगरपालिकाका नगरप्रमुख दीपककुमार रिसालले लेखकले समाजको चित्रण गर्दै कृतिहरू छाड्ने र सरकारले ती सम्पत्तिको अभिलेखीकरणमा सहयोग गर्नुपर्ने बताए। उनले रमेश विकलको साहित्यिक योगदान र आफूसँगको निकटताबारे चर्चा गर्दै नगरपालिकाले विकलका ५२ कृति तथा विभिन्न स्थानमा छरिएर रहेका फुटकर रचनासमेत समेटेर ‘रमेश विकल समग्र’ अन्तर्गत सात खण्डमा एकीकृत अभिलेखीकरण गर्ने महत्त्वाकाङ्क्षी योजना अन्तिम खण्डको तयारीमा पुगेको जानकारी दिए। महाकवि लक्ष्मीप्रसाद देवकोटा र रमेश विकलका तस्बिरमा माल्यार्पण गर्दै सुरु भएको सभाका प्रमुख वक्ता भाषा आयोगका सदस्य मातृका पोखरेलले समाजका भुइँमान्छे र उनीहरूले भोगेका उत्पीडनलाई केन्द्रमा राखेर प्रगतिशील लेखनमा विशिष्ट उचाइ हासिल गर्न रमेश विकल सफल हुनुभएको बताए। उहाँले प्रगतिशील लेखक सङ्घले यस वर्षदेखि शक्ति लम्सालको स्मृतिमा स्थापना गरेको पुरस्कारबाट कीर्तिशेष रमेश विकललाई सम्मान गर्न लागिएको जानकारीसमेत दिए। कार्यक्रमका सभापति, रमेश विकल साहित्य प्रतिष्ठानका उपाध्यक्ष तथा नेपाल ललितकला प्रज्ञा–प्रतिष्ठानका पूर्वकुलपति केके कर्माचार्यले विकलसँगको आफ्नो कलाक्षेत्रको सामीप्य, प्रतिष्ठानको स्थापनाकालदेखि उनले पुर्‍याउनुभएको योगदान र उनका बहुप्रतिभाबारे स्मरण गरे। उनले कार्यक्रममा उपस्थित सम्पूर्णलाई धन्यवाद ज्ञापन गरे। कार्यक्रममा प्रतिष्ठानका कोषाध्यक्ष शाम्बकुमार चालिसेले स्वागत मन्तव्य राख्नुभएको थियो भने आलोक चालिसेले कार्यक्रम सञ्चालन गरेका थिए।