काठमाडौं ।सार्वजनिक बिदाका दिन पनि भक्तपुरका तीन सरकारी अस्पतालले स्वास्थ्य सेवा सञ्चालन गरेका छन्। भक्तपुर क्यान्सर अस्पताल, सहिद धर्मभक्त राष्ट्रिय प्रत्यारोपण केन्द्र र ख्वप अस्पतालले बिदाका दिन पनि बिरामीको उपचारलाई निरन्तरता दिएका हुन्। सोमबार देशभर सार्वजनिक बिदा भए पनि भक्तपुर नगरपालिका(१ दूधपाटीस्थित भक्तपुर क्यान्सर अस्पताल र सहिद धर्मभक्त राष्ट्रिय प्रत्यारोपण केन्द्रले आवश्यक स्वास्थ्य सेवा सञ्चालन गरेका छन्। भक्तपुर नगरपालिका(९ स्थित ख्वप अस्पतालले भने शनिबारसहित वर्षका ३६५ दिन नै सेवा दिँदै आएको जनाएको छ। सहिद धर्मभक्त राष्ट्रिय प्रत्यारोपण केन्द्रका सूचना अधिकारी हरिहर पोखरेलका अनुसार बिरामीको स्वास्थ्य अवस्थालाई ध्यानमा राखेर सार्वजनिक बिदाका दिन पनि आवश्यक सेवा सञ्चालन गरिएको हो। विशेषगरी कलेजो तथा मिर्गौला प्रत्यारोपण गरेका र प्रत्यारोपणको तयारीमा रहेका बिरामीलाई नियमित औषधि सेवन, स्वास्थ्य परीक्षण र चिकित्सकीय परामर्श आवश्यक पर्ने भएकाले सेवा निरन्तरता दिइएको उनले बताए। प्रत्यारोपण गरेका बिरामीले नियमित औषधि सेवन र स्वास्थ्य परीक्षण गर्नुपर्ने हुन्छ। सार्वजनिक बिदाका कारण अस्पतालको सेवा बन्द हुँदा उनीहरूको उपचार प्रभावित हुन सक्ने भएकाले आवश्यकताअनुसार बहिरङ्ग सेवा पनि सञ्चालन गर्ने व्यवस्था मिलाइएको पोखरेलले जानकारी दिए। उनका अनुसार शनिबार र आइतबारबाहेक अन्य सार्वजनिक बिदाका दिन पनि अस्पतालले आवश्यकताअनुसार बहिरङ्ग सेवा सञ्चालन गर्दै आएको छ। वार्षिक रूपमा सीमित सार्वजनिक बिदामा मात्रै सेवा बन्द गर्ने र अन्य दिन बिरामीको आवश्यकतालाई प्राथमिकता दिने अस्पतालको व्यवस्था छ। क्यान्सर तथा प्रत्यारोपणसम्बन्धी उपचार लामो समयसम्म निरन्तरता दिनुपर्ने र नियमित औषधि तथा परीक्षण आवश्यक पर्ने भएकाले बिदाका कारण बिरामी उपचारबाट वञ्चित नहोऊन् भन्ने उद्देश्यले सेवा सञ्चालन गरिएको अस्पतालले जनाएको छ। यस्तै, भक्तपुर नगरपालिकाद्वारा सञ्चालित ख्वप अस्पतालले पनि सार्वजनिक बिदाका दिन नियमित स्वास्थ्य सेवा दिँदै आएको छ। अस्पतालका निमित्त निर्देशक डा। मजेश प्रताप मल्लका अनुसार बिरामीलाई सहज र सुलभ स्वास्थ्य सेवा उपलब्ध गराउने उद्देश्यले वर्षका ३६५ दिन नै अस्पताल सञ्चालन हुँदै आएको छ। आकस्मिक तथा नियमित उपचार आवश्यक पर्ने बिरामीलाई सार्वजनिक बिदाका कारण समस्या नहोस् भन्ने उद्देश्यले अस्पतालले सेवा निरन्तरता दिएको मल्लले बताए।
सार्वजनिक बिदामा पनि भक्तपुरका तीन अस्पतालमा स्वास्थ्य सेवा निरन्तर

Read Complete Original Article
Published originally on नेपालन्युज





_IX1Hc0VGIZ.jpg)
