काठमाडौं। राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंह जनताका समस्या र गुनासा सुन्न दुई महिने मेची–महाकाली पदयात्रामा निस्किएका छन्। जात, धर्म, वर्ग र भूगोलका नाममा हुने विभाजन अन्त्य गर्दै राष्ट्रिय एकता मजबुत बनाउने तथा जनताका वास्तविक समस्या बुझ्ने उद्देश्यले पदयात्रा गर्न लागेको सिंहले बताएका छन्। सोमवार जनकपुरधाममा आयोजित कार्यक्रममा सिंहले मंगलवार बिहान मेचीको किनारबाट पदयात्रा सुरु हुने र आगामी माघ १ गते मकर सङ्क्रान्तिका दिन महाकालीको किनारमा पुगेर समापन हुने जानकारी दिए। उनले पदयात्रालाई देश र समाज जोड्ने अभियानका रूपमा व्याख्या गरे। जात, धर्म, पहाड–मधेस तथा वर्ग र समुदायका नाममा समाजमा द्वन्द्व हुन नहुने भन्दै सबै नेपालीलाई एकताको सूत्रमा बाँध्नुपर्ने उनको भनाइ छ। सिंहले पदयात्राको अर्को मुख्य उद्देश्य जनताका कुरा सुन्नु रहेको बताए। अहिलेसम्म नेताहरूले जनतालाई आफ्ना कुरा सुनाउँदै आएको उल्लेख गर्दै उनले यसपटक जनताकै घरदैलोमा पुगेर उनीहरूका समस्या, गुनासा र अपेक्षा बुझ्ने बताए। – न्युज एजेन्सी नेपाल
जनताको कुरा सुन्न दुई महिने मेची–महाकाली पदयात्रामा अमरेशकुमार सिंह

Read Complete Original Article
Published originally on लुम्बिनी सञ्चार






