सामसङको ग्यालेक्सी एस२७ सिरिज अपेक्षाभन्दा चाँडै आउन सक्ने, मेमोरी अपग्रेडबारे अन्योल

सामसङले आगामी ग्यालेक्सी एस२७ सिरिजका स्मार्टफोन यसअघिका अनुमानभन्दा चाँडै सार्वजनिक गर्न सक्ने भएको छ। कोरियाली सामाजिक सञ्जाल नेभरमा ‘लान्जुक’ नामका प्रयोगकर्ताले सार्वजनिक गरेको जानकारीअनुसार कम्पनीले फोनको हार्डवेयरसम्बन्धी अधिकांश निर्णय गरिसकेको छ। यद्यपि, मेमोरी प्रविधिमा अपग्रेड गर्ने वा नगर्ने विषयमा भने अझै छलफल भइरहेको छ। ग्यालेक्सी एस२६ सिरिज यसअघिका पुस्ताभन्दा ढिलो सार्वजनिक भएको थियो। ग्यालेक्सी एस२४ सिरिज सन् २०२४ को जनवरीको मध्यतिर घोषणा गरी जनवरीको अन्त्यमा बजारमा ल्याइएको थियो। त्यस्तै, एस२५ सिरिज सन् २०२५ को जनवरीको अन्त्यमा घोषणा गरी फेब्रुअरीको सुरुवातमा बिक्रीमा आएको थियो। तर, एस२६ सिरिज सन् २०२६ को फेब्रुअरीको अन्त्यमा घोषणा भएर मार्चको सुरुवातमा बजारमा आएको थियो। एस२६ एजको सट्टा अन्तिम समयमा एस२६ प्लस ल्याउने निर्णय गर्दा ढिलाइ भएको हुन सक्ने अनुमान गरिएको छ। जीएसएमएरिनाका अनुसार आगामी एस२७ सिरिज भने पुनः जनवरी वा फेब्रुअरीमै सार्वजनिक हुन सक्ने बताइएको छ। तर, यसको निश्चित मिति सार्वजनिक भएको छैन। गत सेप्टेम्बरमा सार्वजनिक भएको विवरणअनुसार सामसङले सामान्य ग्यालेक्सी एस२७ र एस२७ प्लसमा पुरानै एलपीडीडीआर५एक्स र यूएफएस ४ सिरिजको स्टोरेज प्रविधि प्रयोग गर्ने योजना बनाएको थियो। त्यसको विपरीत, एस२७ प्रो र एस२७ अल्ट्रामा एलपीडीडीआर६ र यूएफएस ५ प्रयोग गर्ने तयारी थियो। तर, अनुमान गरेभन्दा तीव्र रूपमा मेमोरी बजार तातेपछि कम्पनीले प्रो र अल्ट्रा मोडलमा पनि नयाँ मेमोरी प्रविधि प्रयोग गर्ने योजना रोक्ने कि भन्ने विषयमा छलफल गरिरहेको लान्जुकले उल्लेख गरेका छन्। यूएफएस ५ ले यूएफएस ४.१ को तुलनामा दोब्बर कार्यक्षमता दिने बताइएको छ। यसले प्रतिसेकेन्ड १०.८ गिगाबाइटसम्म डाटा पढ्न र ९.८ गिगाबाइटसम्म लेख्न सक्छ। साथै, यो अघिल्लो संस्करणभन्दा ४० प्रतिशत बढी ऊर्जा किफायती हुने अपेक्षा गरिएको छ। त्यस्तै, एलपीडीडीआर६ मेमोरीले प्रतिपिन १०.६ देखि १४.४ गिगाबिट प्रतिसेकेन्डसम्मको गति दिन सक्छ। एलपीडीडीआर५एक्सको गति प्रतिपिन ८.५ गिगाबिट प्रतिसेकेन्डसम्म छ। यी अपग्रेडले ग्यालेक्सी एस२७ प्रो र एस२७ अल्ट्राको कार्यक्षमता सुधार गर्न सक्ने भए पनि फोन निर्माणको लागत बढाउनेछन्। त्यसैले एस२७ सिरिजका फोन महँगिने सम्भावना रहेको छ। यद्यपि, मूल्य कति बढ्ने भन्ने स्पष्ट भइसकेको छैन। ग्यालेक्सी एस२७ अल्ट्रामा क्वालकमको स्न्यापड्रागन प्रोसेसर प्रयोग गर्ने कि सामसङकै एक्जिनोस प्रोसेसरमा फर्किने भन्ने विषय पनि टुङ्गिएको छैन। क्वालकमले आफ्नो आगामी स्न्यापड्रागन चिपमा अत्यधिक तात्ने समस्या रहेको भन्ने हल्ला अस्वीकार गरेको छ। तर, एस२७ अल्ट्राका लागि सामसङले कुन प्रोसेसर रोज्ने भन्नेबारे अहिलेसम्म स्पष्ट जानकारी आएको छैन। The post सामसङको ग्यालेक्सी एस२७ सिरिज अपेक्षाभन्दा चाँडै आउन सक्ने, मेमोरी अपग्रेडबारे अन्योल appeared first on Technology Khabar.