सभामुख अर्यालद्वारा छठपर्वको अवसरमा बारा र पर्सा जिल्लाका विभिन्न छठघाटहरूको अवलोकन

पर्सा । सभामुख डोलप्रसाद (डीपी) अर्यालले छठपर्वको अवसरमा बारा र पर्सा जिल्लाका विभिन्न छठघाटहरूको भ्रमण, अवलोकन तथा दर्शन गरेका छन् । यस क्रममा सभामुख अर्यालले पर्साको वीरगञ्जस्थित ऐतिहासिक घडिअर्वा पोखरी, नगवा पोखरीलगायतका छठघाट तथा बाराका विभिन्न स्थानमा रहेका छठघाटहरू पुगेर छठी माताको पूजा–आराधना तथा धार्मिक अनुष्ठानमा सहभागी भए । बाराको इटियाही, परवानीपुर र जितपुरस्थित रातो पुल छठघाटमा समेत पुग्नुभएका सभामुख अर्याल मुरलीस्थित छठघाटमा आयोजित छठीमाईको महाआरतीमा सहभागी भए । छठपर्वले प्रकृति, जलाशय, सूर्य र मानव जीवनबीचको सम्बन्धलाई उजागर गर्नुका साथै सामाजिक सद्भाव, एकता, सहिष्णुता र पारिवारिक आत्मीयतालाई थप मजबुत बनाउने विश्वास सभामुख अर्यालले व्यक्त गरे । मधेसको मौलिक संस्कृति र पहिचानसँग जोडिएको छठपर्वले हिमाल, पहाड र तराईबीचको सांस्कृतिक सम्बन्धलाई समेत प्रगाढ बनाउने उनको धारणा थियो। यसै अवसरमा बारामा आयोजित छठपर्व विशेष शुभकामना कार्यक्रममा सम्बोधन गर्दै सभामुख अर्यालले नेपालको विविधतायुक्त धर्म, संस्कृति र सामाजिक सद्भाव विश्वकै लागि उदाहरणीय रहेको बताए । उनले मधेस प्रदेशमा शिक्षा, स्वास्थ्य, पूर्वाधार तथा सामाजिक विकासको पर्याप्त सम्भावना हुँदाहुँदै पनि अपेक्षित उपलब्धि हासिल हुन नसकेको उल्लेख गरे । विकासका लागि जनप्रतिनिधिलाई जिम्मेवार बनाउँदै स्थानीय समस्या पहिचान गरी संवाद, छलफल र सहकार्यमार्फत समाधान खोज्न नागरिकलाई आग्रह गर्नुभयो। आन्दोलनभन्दा सहकार्य, कानुनी शासन, सुशासन र रोजगारी सिर्जनालाई प्राथमिकता दिनुपर्नेमा उनले जोड दिए । त्यसैगरी, पर्साका उद्योगी तथा व्यवसायीहरूसँगको भेटघाटमा व्यवसायीहरूले उधारो कारोबारलाई व्यवस्थित र सुरक्षित बनाउन छुट्टै कानुन निर्माण गर्नुपर्ने, विशेष आर्थिक क्षेत्र (सेज) को प्रभावकारी व्यवस्थापन गर्नुपर्ने तथा लगानी र व्यवसायलाई प्रोत्साहन गर्ने दीर्घकालीन १५ वर्षे आर्थिक नीति अवलम्बन गर्नुपर्ने लगायतका विषय उठाएका थिए। उनीहरूले उद्योग तथा व्यापार क्षेत्रका विद्यमान समस्या, चुनौती र समाधानका उपायबारे सभामुख अर्यालको ध्यानाकर्षण गराएका थिए। The post सभामुख अर्यालद्वारा छठपर्वको अवसरमा बारा र पर्सा जिल्लाका विभिन्न छठघाटहरूको अवलोकन appeared first on Corporate Khabar : Nepals First Corporate News Magazine and Portal.