काठमाडौं । बंगलादेशकी विदेश राज्यमन्त्री शमा ओबेदले भारत र बंगलादेश सरकारबिच शेख हसिनाका विषयमा कुनै पनि सर्तमा कुराकानी नभएको बताएकी छन्। उनले विदेश मन्त्रालयमा आयोजित पत्रकार सम्मेलनमा पत्रकारको प्रश्नको जवाफमा उक्त अभिव्यक्ति दिएकी हुन्। हालै बीबीसी बंगलादेशमा प्रकाशित रिपोर्टमा भारतीय अधिकारीहरूलाई उद्धृत गर्दै शेख हसिना फिर्ता पठाउन भारतले दुई सर्त राखेको उल्लेख थियो। यस विषयमा पत्रकारहरूले बंगलादेशकी विदेश राज्यमन्त्री शमा ओबेदलाई जिज्ञासा राखेका थिए। जवाफमा उनले भनिन्, ‘हामीलाई कुनै पनि आधिकारिक स्रोतबाट त्यस्तो कुनै जानकारी प्राप्त भएको छैन। भारतीय विदेश मन्त्रालय वा सरकारले आधिकारिक रूपमा केही भने मात्र हामी जवाफ दिनेछौँ।” प्रेस सम्मेलनमा उनले अगाडि भनिन्, ‘भारत र बंगलादेशबिचको सम्बन्ध शेख हसिनाभन्दा धेरै ठुलो छ। हामीसँग केही समस्या छन्, जुन हामी कूटनीतिमार्फत समाधान गर्नेछौँ। उनी (हसिना) भारतबाट बंगलादेशको वातावरण अस्थिर बनाउन खोजिरहेकी छन्।’२०२४ अगस्टमा विद्यार्थी आन्दोलन थेग्न नसकेपछि शेख हसिना बंगलादेश छाडेर भारत भागेकी थिइन्। त्यसयता उनी भारतमै छिन्। शेख हसिनाको राहदानीबारे शमा ओबेदले भनिन्, ‘जहाँसम्म मलाई थाहा छ, बंगलादेशी नागरिक हुनेबित्तिकै राहदानी पाउने ग्यारेन्टी हुँदैन। यदि तपाईंलाई दोषी ठहर्याइएको छ भने जुलाई २०२४ मा भएको घटना मानवताविरुद्धको अपराध हो। यस मुद्दामा फैसला सुनाइएको छ र उनलाई दोषी ठहर्याइएको छ। उनलाई मृत्युदण्डको सजाय सुनाइएको छ। कानुन मन्त्रालयले यस्तो अवस्थामा उनी कसरी आउन सक्छिन् भनेर विचार गरिरहेको छ।’
शेख हसिना फिर्ताका लागि भारतको सर्तमा बंगलादेशको यस्तो जवाफ

Read Complete Original Article
Published originally on केन्द्रबिन्दु






