काठमाडौं। वैदेशिक रोजगारीका नाममा ठगी गरी गैरकानुनी रूपमा रकम संकलन गरेर मलेसिया पठाएको आरोपमा पूर्वमन्त्रीसहित ६ जना पक्राउ परेका छन्। नेपाल प्रहरीको केन्द्रीय अनुसन्धान ब्युरो (सीआईबी) ले ठगी तथा संगठित अपराधसम्बन्धी कसुरमा उनीहरूलाई पक्राउ गरेको हो। पक्राउ पर्नेमा तत्कालीन श्रम, रोजगार तथा सामाजिक सुरक्षामन्त्री शेरबहादुर कुँवर र रामेश्वर राय यादव रहेका छन्। त्यस्तै, मन्त्रालयका तत्कालीन सचिव विनोद केसी, तत्कालीन रोजगार व्यवस्थापन महाशाखा प्रमुख (सहसचिव) उमेश ढुंगाना, राजीव पोखरेल र तत्कालीन कानुन अधिकृत (उपसचिव) निर्मला गुरुङ पनि पक्राउ परेका छन्। सीआईबीका अनुसार प्रधानमन्त्री तथा मन्त्रिपरिषद्को कार्यालय र वैदेशिक रोजगारसम्बन्धी विभिन्न निकायबाट प्राप्त पत्र तथा विकास रनाभाटसमेतको जाहेरीका आधारमा उनीहरूमाथि अनुसन्धान अघि बढाइएको हो। नेपाल सरकार र मलेसिया सरकारबीच भएको समझदारीपत्र (एमओयू) विपरीत गैरकानुनी रूपमा रकम संकलन गरी मलेसिया पठाउने निर्णयमा उनीहरूको संलग्नता रहेको प्रहरीको आरोप छ। संकलित रकममध्ये अमेरिकी डलर र बेलायती पाउन्डसमेत ठूलो परिमाणमा मलेसिया पठाइएको अनुसन्धानबाट खुलेको सीआईबीले जनाएको छ। प्रहरीका अनुसार सम्झौताको दायरा र कानुनी प्रक्रियाविपरीत अधिकार क्षेत्र नाघेर विदेशी मुद्रा अपचलन गरिएको थियो। यसबाट मुलुकको अर्थतन्त्रमा प्रतिकूल असर पर्ने निर्णय गरी संगठित समूहको लाभका लागि सरकारी पद तथा जिम्मेवारीको दुरुपयोग गरिएको आरोप उनीहरूमाथि लगाइएको छ। गैरकानुनी रूपमा संकलित रकम कानुनी उपचारको प्रक्रिया पूरा नगरी मलेसिया पठाउने कार्यमा संलग्न व्यक्तिहरूमाथि अनुसन्धान गर्न काठमाडौं जिल्ला अदालतबाट मंसिर २ गते पक्राउ पुर्जी जारी गर्ने अनुमति लिइएको सीआईबीले जनाएको छ। प्रहरीले उनीहरूलाई काठमाडौं, ललितपुर र सर्लाहीका विभिन्न स्थानबाट पक्राउ गरेको हो। पक्राउ परेका सबैमाथि थप अनुसन्धान भइरहेको सीआईबीले जानकारी दिएको छ।
वैदेशिक रोजगारी ठगी प्रकरणमा पूर्वमन्त्रीसहित ६ जना पक्राउ

Read Complete Original Article
Published originally on नेपालन्युज






