काठमाडौं । नेपाल र लाओसबीचको ऐतिहासिक, सांस्कृतिक तथा कूटनीतिक सम्बन्ध थप सुदृढ बनाउँदै व्यापार, पर्यटन, लगानी तथा सांस्कृतिक आदानप्रदान विस्तार गर्नुपर्नेमा जोड दिइएको छ । नेपालका लागि लाओसका अवैतनिक वाणिज्यदूत राजु श्रेष्ठले नेपालका लागि लाओसका नवनियुक्त राजदूत महामहिम भिथाया सायाभोङको सम्मानमा आयोजित स्वागत कार्यक्रममा दुर्ई देशबीच सहकार्यका नयाँ सम्भावनालाई अघि बढाउनुपर्ने बताउनुभएको हो । उहाँले नेपाल र लाओसबीचको साझा बौद्ध सम्पदालाई द्विपक्षीय सम्बन्ध विस्तारको महत्त्वपूर्ण आधारका रूपमा उल्लेख गर्दै लुम्बिनीमा लाओसको बुद्ध मन्दिर निर्माणका लागि लाओस सरकार तथा सम्बन्धित निकायको सहयोग र समन्वय आवश्यक रहेको बताउनुभयो । नेपाल सरकारले मन्दिर निर्माणका लागि लुम्बिनीमा जग्गा उपलब्ध गराइसकेको जानकारी दिँदै उहाँले उक्त परियोजनालाई दुर्ई देशबीचको मित्रताको स्थायी प्रतीक बनाउनुपर्नेमा जोड दिनुभयो । त्यसैगरी, लामो समयदेखि रोकिएको नेपाल-लाओस चेम्बर अफ कमर्स गठन प्रक्रिया अगाडि बढाउन आफू इच्छुक रहेको बताउँदै श्रेष्ठले दुवै देशका व्यवसायी समुदायको सहभागिताबाट व्यापार, लगानी र पर्यटनका क्षेत्रमा नयाँ अवसर सिर्जना गर्न सकिने धारणा व्यक्त गर्नुभयो । दुई देशबीचका नागरिकबीच एकअर्काको संस्कृति, परम्परा र जीवनशैलीबारे जानकारी तथा अनुभव आदानप्रदान बढाउनुपर्नेमा जोड दिँदै उहाँले जनस्तरको सम्बन्धले कूटनीतिक मित्रतालाई थप अर्थपूर्ण बनाउने बताउनुभयो । नेपालका प्रसिद्ध आँखा चिकित्सक डा. सन्दुक रुइत तथा तिलगंगा आँखा प्रतिष्ठानले लाओसमा गर्दै आएको सेवा र सहकार्यलाई दुर्ई देशबीचको मित्रताको उत्कृष्ट उदाहरणका रूपमा प्रस्तुत गर्दै उक्त कार्यले स्वास्थ्य सेवामार्फत् जनस्तरमा सम्बन्ध विस्तार गरेको उल्लेख गर्नुभयो । उहाँले लाओसका नवनियुक्त राजदूत महामहिम भिथाया सायाभोङलाई सफल कार्यकालको शुभकामना दिँदै दुई देशबीचको सम्बन्ध थप उचाइमा पुर्याउन अवैतनिक वाणिज्यदूतको कार्यालयले निरन्तर सहयोग र सहकार्य गर्ने प्रतिबद्धता व्यक्त गर्नुभयो । लाओसका नवनियुक्त राजदूत भिथाया सायाभोङले आफूलाई सम्मान गरेकोमा धन्यवाद व्यक्त गर्दै नेपाल र लाओसबीच धेरै समानता रहेको बताउनुभयो । दुवै देशमा पहाड तथा प्राकृतिक सम्पदाको समानता रहेको उल्लेख गर्दै उहाँले पर्यटन र व्यापारका क्षेत्रमा सहकार्य विस्तार गर्न आफू उत्साहित रहेको बताउनुभएको थियो । नेपालका प्रसिद्ध आँखा चिकित्सक डा. सन्दुक रुइतले पनि दुई देशबीचको साझा प्राकृतिक तथा सांस्कृतिक सम्पदाबारे चर्चा गर्नुभयो । दुवै देशमा ऐतिहासिक सम्पदा र पहाडहरू रहेको उल्लेख गर्दै उहाँले लाओसमा बौद्ध धर्मावलम्बीहरूको ठूलो उपस्थिति रहेको र गौतम बुद्धको जन्मस्थल नेपाल भएकाले त्यहाँका नागरिकले नेपाललाई विशेष सम्मान गर्ने गरेको बताउनुभयो । लाओस भ्रमणका क्रममा त्यहाँको स्वास्थ्य मन्त्रालयका प्रतिनिधिहरूसँग भेट गरी अन्धोपनको समस्या र त्यसको समाधानका लागि गर्न सकिने उहाँको भनाइ थियो ।
लाओससँग व्यापारिक सम्बन्ध विस्तारमा जोड

Read Complete Original Article
Published originally on हिमालय टाइम्स






