रौतहट । स्थानीय बजारमा आर्थिक गतिविधि चलायमान बनाउन र जिल्लाको व्यापारिक पहिचान थप विस्तार गर्ने लक्ष्यसहित रौतहटको गौरमा मंसिर ६ गतेदेखि ‘रौतहट एक्स्पो २०८३’ आयोजना हुने भएको छ । मंसिर २२ गतेसम्म सञ्चालन हुने एक्स्पोले गौरमा व्यापारिक तथा मनोरञ्जनात्मक वातावरण सिर्जना गर्ने अपेक्षा गरिएको आयोजकले जनाएको छ । मंसिर २२ गतेसम्म सञ्चालन हुने एक्स्पोले गौरमा व्यापारिक तथा मनोरञ्जनात्मक वातावरण सिर्जना गर्ने आयोजकको अपेक्षा छ । रौतहट उद्योग वाणिज्य संघको आयोजना र निर्माण व्यवसायी संघ रौतहटको सहआयोजनामा रौतहटको गौरस्थित राइस मिल्सको खेल मैदानमा आयोजना हुने रौतहट एक्स्पोमा व्यापार, स्थानीय उत्पादन, वस्तु तथा सेवाको प्रदर्शनी र बिक्रीका साथै विभिन्न मनोरञ्जनात्मक कार्यक्रम सञ्चालन गरिने भएकाले एक्स्पोलाई जिल्लाको आर्थिक गतिविधि विस्तार गर्ने अवसरका रूपमा हेरिएको छ । लामो समयदेखि सुस्त जिल्लाको व्यापारिक क्षेत्र पुनः सक्रिय बनाउने, स्थानीय उत्पादन बजारसँग जोड्ने र उपभोक्ता तथा व्यवसायीबीच प्रत्यक्ष सम्पर्क स्थापित गर्ने उद्देश्यले एक्स्पोको आयोजना गरिएको आयोजकले जनाएको छ । मेला परिसरमा आयोजित पत्रकार सम्मेलनमा आयोजक रौतहट उद्योग वाणिज्य संघका अध्यक्ष रविन्द्रनाथ गोपालीले एक्स्पोको तयारी पूरा भइसकेको बताउनुभयो । एक्स्पोमा स्थानीय उद्योगी, व्यवसायी, कृषक तथा उत्पादकलाई आफ्ना उत्पादन प्रचारप्रसार र बिक्रीका लागि स्टलको व्यवस्था मिलाइएको जानकारी दिँदै उहाँले एक्स्पोले स्थानीय उत्पादनको पहिचान बढाउनुका साथै व्यवसाय विस्तारमा सहयोग पुग्ने विश्वास व्यक्त गर्नुभयो । एक्स्पोमा व्यापारिक प्रदर्शनीसँगै मनोरञ्जनका नयाँ आकर्षणसमेत समेटिएको छ । विशेषगरी लण्डन ब्रिज र जलपरी मेलाको प्रमुख आकर्षणका रूपमा रहेको आयोजकले जनाएको छ । त्यसैगरी नेपालमै पहिलोपटक ग्रेभिटीसहितको झुलुवा, सुनामी झुलुवा, रसियन झुलुवा तथा अन्य मनोरञ्जनात्मक खेल रहने र मनोरञ्जनका लागि भोजपुरी स्टार कलाकार तथा स्थानीय कलाकारहरूको प्रस्तुति रहने बताइएको छ । बालबालिका, युवा र परिवारसहित मेला घुम्न आउने दर्शकलक्षित गरी मनोरञ्जनका सामग्री तयार पारिएको आयोजकको भनाइ छ । आयोजकका अनुसार मेला अवलोकन गर्न आउने सर्वसाधारणको सुरक्षाका लागि प्रहरी प्रशासनसँग आवश्यक समन्वय गरिएको छ भने सम्भावित दुर्घटनाबाट हुन सक्ने क्षति जोखिम न्यूनीकरण गर्न बीमाको व्यवस्था पनि गरिएको छ । पत्रकार सम्मेलनमा निर्माण व्यवसायी संघका कोषाध्यक्ष विकास विक्रान्त नेपाल, नेपाल पत्रकार महासंघ रौतहट शाखाका सचिव गौतम श्रेष्ठ, मनोज कुशवाहा, अमित गुप्ता, आशुतोष सिंहलगायत आयोजक समितिका पदाधिकारीहरूको उपस्थिति थियो । व्यापार, स्थानीय उत्पादन प्रवर्द्धन र मनोरञ्जनलाई एउटै थलोमा जोड्ने उद्देश्यले आयोजना हुन लागेको एक्स्पोले गौर बजारमा चहलपहल ल्याउने अपेक्षा गरिएको छ । आयोजकले जिल्लाका उद्योगी, व्यवसायी, स्थानीय बासिन्दा तथा सर्वसाधारणलाई एक्स्पोमा सहभागी हुन आग्रहसमेत गरेको छ ।
रौतहट एक्स्पोमा लण्डन ब्रिज र जलपरी आकर्षण

Read Complete Original Article
Published originally on हिमालय टाइम्स






