योगमाया आयुर्वेद विश्वविद्यालय निर्माण अघि बढ्दै

विराटनगर। कोशी प्रदेशका मुख्यमन्त्री हिक्मतकुमार कार्कीले विदुषी योगमाया हिमालयन आयुर्वेद विश्वविद्यालय निर्माण क्षेत्रको आज अनुगमन गरेका छन्। संखुवासभाको खाँदबारी नगरपालिका–९ मा रहेको जग्गाको स्थलगत अवलोकन गर्दै उनले आगामी दिनमा विश्वविद्यालयमा गर्न सकिने कामका विषयमा समेत छलफल गरेको मुख्यमन्त्री कार्कीका प्रेस सल्लाहकार विक्रम लुइँटेलले जानकारी दिए। अनुगमनपछि जिल्ला समन्वय समितिको कार्यालयमा विश्वविद्यालयको गुरुयोजनाबारे प्रस्तुति तथा छलफल समेत भएको जानकारी दिइएको छ। मुख्यमन्त्री कार्कीले विशिष्ट प्रकृतिको उक्त विश्वविद्यालयलाई संसारकै उत्कृष्ट विश्वविद्यालयका रूपमा विकास गर्न सकिने बताए। उनले विश्वविद्यालयलाई यथाशक्य शीघ्र सञ्चालनमा ल्याउन प्रदेश सरकारले आफ्नो सीमित स्रोतसाधनले भ्याएसम्म सहयोग गर्ने प्रतिबद्धता व्यक्त गरे। विश्वविद्यालयका लागि खाँदबारी नगरपालिका–९ र भोजपुरको षडानन्द नगरपालिका–६ मा गरी ४१६ रोपनी जग्गा उपलब्ध रहेको छ। उक्त जग्गामा भौतिक संरचना निर्माणको काम यसै वर्ष सुरु गर्ने गरी तयारी गरिएको छ। विश्वविद्यालयको कामलाई अगाडि बढाउन बृहत् गुरुयोजना समेत निर्माण गरिसकिएको विश्वविद्यालयका अध्यक्ष तथा प्रतिनिधिसभा सदस्य अर्जुनबहादुर कार्कीले जानकारी दिए। उक्त विश्वविद्यालय स्थापना नेपालको मौलिक चिकित्सा पद्धति आयुर्वेद, योग, ध्यान, हिमाली चिकित्सा, जडीबुटी तथा वैकल्पिक चिकित्साको अध्ययन, अध्यापन र अनुसन्धानलाई प्रवर्द्धन गर्ने उद्देश्यले गरिएको हो। विश्वविद्यालयको नाम समाज सुधारक एवं महिला अधिकारकी अग्रणी अभियन्ता तथा क्रान्तिकारी योगमाया न्यौपानेको सम्मानमा राखिएको हो। उनको जन्म भोजपुरमा भएको थियो। तत्कालीन राणा शासनको समयमा पनि सामाजिक विभेद, अन्याय, कुरीति र लैङ्गिक असमानताविरुद्ध उनले सशक्त आवाज उठाएकी थिइन्। उनको सामाजिक सुधारको अभियान र त्यागलाई राष्ट्रिय रूपमा सम्मान गर्ने उद्देश्य पनि विश्वविद्यालय स्थापनासँग जोडिएको छ। विश्वविद्यालय स्थापनाको अवधारणा आर्थिक वर्ष २०७०/०७१ देखि अघि बढाइएको थियो भने आर्थिक वर्ष २०७३/०७४ को सरकारको नीति तथा कार्यक्रममा विश्वविद्यालय स्थापनाको विषय समावेश गरिएको थियो। विसं २०७९ साउन २८ गते योगमाया आयुर्वेद विश्वविद्यालय ऐन, २०७९ जारी भएपछि विश्वविद्यालय स्थापनाले औपचारिक कानुनी आधार प्राप्त गरेको छ। विश्वविद्यालयको केन्द्रीय कार्यालय संखुवासभाको खाँदबारी नगरपालिका–९, तुम्लिङटारमा छ। सरकारले उक्त विश्वविद्यालयका पदाधिकारी नियुक्त गरी कामलाई अगाडि बढाएको छ। उक्त विश्वविद्यालय नेपालको मौलिक ज्ञान, परम्परागत चिकित्सा प्रणाली र आधुनिक अनुसन्धानलाई एकीकृत गर्ने राष्ट्रिय महत्वपूर्ण शैक्षिक संस्था भएको कोशी प्रदेश सरकारका आर्थिक मामिला तथा योजनामन्त्री विदुरकुमार लिङ्थेपले जानकारी दिए।