मौलिक पर्व, भाषा र संस्कृतिको संरक्षणमा बागमती प्रदेश सरकार प्रतिबद्ध : मुख्यमन्त्री किरण थापा मगर

हेटौँडा, कात्तिक २४ । बागमती प्रदेशका मुख्यमन्त्री किरण थापा मगरलेविविधतायुक्त विशेषताहरूबीचको सुदृढ एकता नै हाम्रो मौलिक पहिचान र सांस्कृतिक धरोहर भएकाे बताउनु भएकाे छ । नेपालीहरूको महान् पर्व तिहार (दीपावली) २०८३ तथा नेपाल संवत् ११४७ को अवसरमा आज शुभकामना सन्देश जारी गर्दै मुख्यमन्त्री थापा मगरले मौलिक पर्व, भाषा तथा संस्कृतिको संरक्षण र संवर्द्धनमा प्रदेश सरकार प्रतिबद्ध रहेको बताउनुभएको हो। उहाँले नेपाल बहुजातीय, बहुभाषिक र बहुसांस्कृतिक विविधताले भरिपूर्ण सुन्दर राष्ट्र भएको उल्लेख गर्दै विविधताबीचको एकता नै नेपालको विशिष्ट पहिचान भएको बताउनुभएको छ। “नेपाल बहुजातीय, बहुभाषिक र बहुसांस्कृतिक विविधताले भरिपूर्ण एक सुन्दर राष्ट्र हो। विविधतायुक्त विशेषताहरूबीचको सुदृढ एकता नै हाम्रो मौलिक पहिचान र सांस्कृतिक धरोहर हो,” उहाँले शुभकामना सन्देशमा उल्लेख गर्नुभएको छ। मुख्यमन्त्री थापा मगरले नेपाली समाजमा मनाइने मौलिक चाडपर्व तथा ऐतिहासिक सांस्कृतिक परम्पराले सामाजिक सद्भाव, भ्रातृत्व र राष्ट्रिय एकताको भावना अभिवृद्धि गर्न महत्वपूर्ण योगदान पुर्‍याउँदै आएको बताउनुभएको छ। “यस्ता मौलिक पर्व र ऐतिहासिक संवाहकहरूले नेपाली समाजमा भ्रातृत्व, भावनात्मक एकता र राष्ट्रिय गौरवको भावना अभिवृद्धि गर्न विशिष्ट योगदान पुर्‍याउँदै आएका छन्,” उहाँले भन्नुभएको छ। मौलिक संस्कृति र परम्पराको संरक्षणलाई प्रदेश सरकारले प्राथमिकतामा राखेको उल्लेख गर्दै उहाँले स्थानीय तह तथा सरोकारवाला निकायसँगको समन्वयमा यस क्षेत्रमा काम गर्ने प्रतिबद्धता व्यक्त गर्नुभएको छ। “बागमती प्रदेश सरकार आफ्नो अभिभावकीय भूमिका निर्वाह गर्दै, स्थानीय तह र सरोकारवाला निकायहरूसँगको समन्वयमा यस्ता राष्ट्रिय गहनाका रूपमा रहेका चाडपर्व, भाषा एवं संस्कृतिको संरक्षण र संवर्द्धन गर्न सदैव प्रतिबद्ध रहेको छ,” मुख्यमन्त्री थापा मगरले स्पष्ट पार्नुभएको छ। उहाँले दशैँपछिको दोस्रो ठूलो पर्वका रूपमा रहेको तिहार धार्मिक, सांस्कृतिक र सामाजिक दृष्टिकोणले विशिष्ट महत्वको पर्व भएको बताउनुभएको छ। पाँच दिनसम्म यमपञ्चकका रूपमा मनाइने यस पर्वले मानव र प्रकृतिका साथै पशुपन्छीबीचको प्रगाढ सम्बन्धलाई उजागर गर्ने उहाँको भनाइ छ। “पाँच दिनसम्म यमपञ्चकको रूपमा मनाइने यस पर्वले मानव र प्रकृति तथा पशुपन्छीबीचको प्रगाढ सम्बन्धलाई उजागर गर्दछ,” उहाँले सन्देशमा उल्लेख गर्नुभएको छ। तिहारको सांस्कृतिक तथा धार्मिक महत्वबारे चर्चा गर्दै मुख्यमन्त्री थापा मगरले घरघरमा दीप प्रज्वलन गरी लक्ष्मीको पूजा आराधना गर्ने, देउसी–भैलोजस्ता मौलिक संस्कृतिलाई जीवन्त राख्ने तथा भाइटीकाका माध्यमबाट दिदीबहिनी र दाजुभाइबीचको सम्बन्धलाई प्रगाढ बनाउने परम्परा यस पर्वका विशेषता भएको बताउनुभएको छ। “घरघरमा दीप प्रज्वलन गरी धनधान्यकी देवी लक्ष्मीको पूजा आराधना गर्नु, देउसी–भैलोजस्ता मौलिक संस्कृतिलाई जीवन्त राख्नु र भाइटीकामार्फत दिदीबहिनी तथा दाजुभाइको पवित्र प्रेमलाई प्रगाढ बनाउनु यसको मुख्य विशेषता हो,” उहाँले भन्नुभएको छ। त्यसैगरी, नेपाल संवतकाे नयाँ वर्ष र नेवार समुदायले मनाउने म्ह पूजाको सांस्कृतिक महत्वलाई पनि उहाँले विशेष रूपमा उल्लेख गर्नुभएको छ। राष्ट्रिय गौरवको प्रतीकका रूपमा रहेको नेपाल संवत्को नयाँ वर्ष तथा नयाँ वर्षकै अवसरमा नेवार समुदायले धार्मिक आस्थाका साथ मनाउने म्ह पूजा (आत्मपूजा) ले नेपालको सांस्कृतिक वैभवलाई थप उचाइ दिएको उहाँको भनाइ छ। मुख्यमन्त्री थापा मगरले चाडपर्वलाई आपसी सम्बन्ध र सामाजिक सद्भाव सुदृढ गर्ने अवसरका रूपमा लिनुपर्नेमा जोड दिनुभएको छ। तिहार र नेपाल संवत्को अवसरले नेपालीबीचको भाइचारा, मित्रता र भावनात्मक एकतालाई थप बलियो बनाउने विश्वास पनि उहाँले व्यक्त गर्नुभएको छ। “तिहार र नेपाल संवतकाे यस पावन घडीलाई आपसी सद्भाव, भाइचारा र मित्रवत् सम्बन्ध विकास गर्ने सुखद अवसरका रूपमा मनाउन सम्पूर्णमा अपिल गर्दछु,” उहाँले शुभकामना सन्देशमा भन्नुभएको छ। उहाँले तिहार (दीपावली) २०८३ तथा नेपाल संवत् ११४७ को अवसरमा सम्पूर्ण नेपालीमा हार्दिक मङ्गलमय शुभकामना व्यक्त गर्नुभएको छ।