‘मिनि संसदमा’ उठ्यो पत्रकार धरपकड र विचौलिया इनम सापकोटा प्रकरण

नेपाली कांग्रेसकी सांसद नीनुकुमारी कर्णले पत्रकारमाथिको धरपकड तथा बिचौलिया इनम सापकोटासँग न्यायाधीश जोडिएको प्रकरणमा छानबिन समिति गठन गरी अनुसन्धान गर्न सरकारको ध्यानाकर्षण गराएकी छन् । बुधबार सिंहदरबारमा बसेको प्रतिनिधिसभाअन्तर्गतको कानुन, न्याय तथा मानव अधिकार समितिको बैठकमा बोल्दै उनले यस्तो ध्यानाकर्षण गराएकी हुन् । समाचार कक्षमै प्रवेश गरेर पत्रकारमाथि गरिएको धरपकडको निन्दा गर्दै उनले पत्रकार पक्राउ गर्न प्रहरी सञ्चारगृहमा पुग्ने तर पक्राउबारे गृह मन्त्रालय तथा प्रधानमन्त्री कार्यालयको सचिवालयले अनभिज्ञता प्रकट गर्ने घटनामा सरकारसँग जवाफ माग गरिन् । आगामी दिनमा सञ्चारमाध्यम र पत्रकारलाई आतंकित पार्ने गतिविधि नगर्न पनि उनले चेतावनी दिइन् । न्यायालयमाथि सामाजिक सञ्जालमार्फत नेतृत्व तहकै व्यक्तिहरूबाट आक्रमणको प्रयास भइरहेको भन्दै उनले आपत्ति जनाइन् । बिचौलिया इनम सापकोटा र उनीसँग नेक्सस रहेका न्यायाधीशहरूमाथि अनुसन्धान गर्न छानबिन समिति गठन गर्न पनि उनले समिति सभापतिमार्फत सरकारको ध्यानाकर्षण गराइन् । त्यसैगरी, सत्तारुढ दल राष्ट्रिय स्वतन्त्र पार्टी (रास्वपा)का सांसद खगेन्द्र सुनारको अडियो प्रकरणको अनुसन्धानको प्रगति विवरण सार्वजनिक गर्न उनले माग गरिन् । सांसद सुनारमाथि यथाशीघ्र कारबाही प्रक्रिया अघि बढाउनसमेत उनले आग्रह गरिन् । उनले भनिन्, ‘प्रहरी पत्रकारलाई समात्न मिडियाहाउसमा पुग्छ, मिडियाकर्मीहरुलाई समातेर प्रहरीले लैजान्छ र गृह मन्त्रालय र प्रधानमन्त्री कार्यालयको सचिवालयले थाहा छैन भनेर सामाजिक संजालबाटै बाहिर लेख्छ । यो के हो ? यस विषयमा म समिति सभापतिमार्फत सरकारको ध्यानाकर्षण गराउन चाहान्छु । पत्रकार र मिडिया र मिडियालाई किन आतंकित पार्ने काम गरेको ? समाचारको बारेमाख सत्यतथ्य लेख्ने निकाय सरकारसँग छ कि छैन ? यो विषयमा सरकारको ध्यानाकर्षण गराउन चाहान्छु ।’ न्यायालयसँग सम्बन्धित विषयमा छानबिन समिति गठन गर्न माग गर्दै उनले भनिन्, ‘दोस्रो, अहिले न्यायालय देशको सर्वोच्च निकाय हो, जहाँ प्रत्येक नागरिकले न्याय पाउने अधिकार छ । अहिले न्यायालयलाई पनि आतंकित बनाइएको छ, त्यो पनि सामाजिक संजाल मार्फत नै भइरहेको छ । त्यो न्यायालय माथि प्रहार गर्ने को हो ? न्यायालयसँग सम्बन्धित यतिधेरै कुरा किन आइरहेको छ ? एक जना ३० वर्षे युवक इनम सापकोटा भन्ने व्यक्तिको कारणले अहिले न्यायालय माथि गम्भीर प्रश्न तेर्सिएको छ । त्यसको जवाफ कसले दिने ? यसको जवाफ दिन न्यायलयमाथि उठेका प्रश्नहरुको विषयमा छानबिन समिति गठन गरेर अनुसन्धान गर्न समेत सभापतिमार्फत सरकारको ध्यानाकर्षण गराउन चाहान्छु ।’ रास्वपा सांसदसँग जोडिएको अडियो प्रकरणबारे उनले भनिन्, ‘अर्को, रास्वपाका एक जना माननीयज्यूसँग जोडिएको घटना पनि सामाजिक संजालमा एकदम धेरै आयो । जसमा पूर्व राज्यमन्त्रीको नाम जोडिएको थियो । त्यो पनि अडियोहरु बाहिर आएको थियो । सार्वजनिक अडियोमा सार्वजनिक भएका शब्दहरु सुन्नै नसकिने किसिमका छन् । किन यो विषयमा छानबिन भइरहेको छैन । उच्च पदस्थ पदमा हुने व्यक्तिमाथि कारबाही नहुने हो ?’