मन्त्री पुनद्वारा फापरखेतको पहिरोको स्थलगत निरिक्षण

म्याग्दी । पश्चिम म्याग्दीलाई जिल्ला सदरमुकाम बेनीसँग जोड्ने प्रमुख मार्ग बेनी-दरबाङ सडकको फापरखेत पहिरो समस्या अझै चुनौतीपूर्ण बनेको छ । वर्षा र हिउँद दुवै समयमा पहिरो खस्ने क्रम नरोकिएपछि यात्रु तथा सवारीसाधनले भोग्दै आएको सास्ती अन्त्य गर्न विज्ञान, प्रविधि तथा नवप्रवर्तनमन्त्री महावीर पुनले स्थायी समाधानको पहल तीव्र बनाउनुभएको छ । मन्त्री पुनले शनिबार पहिरो प्रभावित क्षेत्रको स्थलगत निरीक्षण गर्दै भइरहेको कार्य, प्राविधिक अवस्था र दीर्घकालीन व्यवस्थापनका योजनाबारे जानकारी लिनुभएको हो । बर्खा सुरु हुनुअघि नै समस्या समाधानका लागि आवश्यक पहल भइरहेको उहाँले बताउनुभएको छ । बेनी नगरपालिका-४ र मङ्गला गाउँपालिका-२ को सिमानामा पर्ने फापरखेतमा पटकपटक पहिरो खस्दा सडक सञ्चालनमा समस्या हुँदै आएको छ । गत शनिबार खसेको सुक्खा पहिरोका कारण अवरुद्ध सडक मर्मत गरेर खुलाइए पनि माथिल्लो क्षेत्रबाट ढुङ्गामाटो खस्ने क्रम जारी रहेकाले यातायात सहज हुन सकेको छैन । निर्वाचित भएपछि तेस्रोपटक पहिरोस्थलको निरीक्षण गर्नुभएका मन्त्री पुनले यसअघि एक वर्षभित्र पहिरोको स्थायी समाधान गर्ने प्रतिबद्धता जनाउनुभएको थियो । पछिल्लो निरीक्षणमा पनि उहाँले छिटो सम्पन्न गर्न सकिने र बर्खाको समयमा समेत प्रभावकारी हुने विकल्पमा चासो दिनुभएको स्थानीयले बताएका छन् । यसअघि मन्त्री पुनको आग्रहमा पूर्वाधार विकासमन्त्री सुनील लम्सालसहितको टोलीले बिहीबार पहिरोस्थलको अनुगमन गरेको थियो । राष्ट्रिय स्वतन्त्र पार्टी म्याग्दीका सभापति युवराज रोकाका अनुसार मन्त्री पुनसहितको टोलीले प्राविधिकहरूसँग अहिले भइरहेको काम र आगामी योजनाबारे छलफल गरिरहेको छ । चालु आर्थिक वर्षमा पहिरो नियन्त्रणका लागि सङ्घीय सरकारबाट चार करोड रुपैयाँ विनियोजन गरिएको छ । त्यस्तै, प्रदेश सरकारबाट पक्की पुल निर्माणका लागि ठेक्का प्रक्रिया अघि बढाइएको छ । तर, फापरखेतको पहिरो नियन्त्रणको चुनौती बजेट र मर्मतमा मात्र सीमित छैन । प्राविधिकहरूको भनाइमा हालको सडकखण्डबाटै पहिरोको स्थायी समाधान खोज्ने सम्भावना न्यून रहेकाले वैकल्पिक मार्ग निर्माणलाई प्राथमिकता दिनुपर्ने देखिएको छ । उक्त मार्गसमेत करिब पाँच महिनाभित्र निर्माण सम्पन्न गर्न नसकिए आगामी बर्खामा यात्रुले थप सास्ती खेप्नुपर्ने जोखिम छ । २०५८ सालमा सडकको मार्ग खोल्नुअघिदेखि नै पहिरो रोकथामका लागि करोडौँ रुपैयाँ खर्च भइसकेको फापरखेतमा अबको मुख्य चुनौती विगतका प्रयासलाई प्रभावकारी समाधानमा बदल्नु हो । मन्त्री पुनको प्रतिबद्धता कार्यान्वयनमा आएमा पश्चिम म्याग्दीको यातायात सहज बनाउन महत्वपूर्ण उपलब्धि हुने अपेक्षा गरिएको छ ।