बीपी क्यान्सर अस्पताललाई अनुसन्धान केन्द्र बनाउन चीनसँग आग्रह

काठमाडौं।राष्ट्रिय सभाका अध्यक्ष नारायणप्रसाद दाहालले भरतपुरस्थित बीपी कोइराला मेमोरियल क्यान्सर अस्पताललाई राष्ट्रियस्तरको अध्ययन तथा अनुसन्धान प्रतिष्ठानका रूपमा विकास गर्न चीन सरकारसँग सहयोग मागेका छन्। आइतबार काठमाडौंमा आयोजित ‘नमस्कार, मेरा चिनियाँ डाक्टर’ वृत्तचित्र प्रदर्शनी कार्यक्रममा उनले अस्पतालको पूर्वाधार र संस्थागत क्षमतालाई उपयोग गर्दै क्यान्सर उपचारसँगै अनुसन्धान, अध्ययन र विशेषज्ञ जनशक्ति उत्पादनको केन्द्र बनाउनु पर्ने बताए। प्रतिष्ठान स्थापनाका लागि आवश्यक प्राविधिक सहयोग, संस्थागत संरचना विकास, विशेषज्ञ जनशक्ति उत्पादन तथा शैक्षिक सहकार्यमा चीनको सहयोग आवश्यक रहेको उनको भनाइ थियो। नेपाल–चीन सहकार्यमा सन् १९९९ मा स्थापना भएको अस्पताल सुरुमा सय शय्याको रहेकामा अहिले पाँच सय शय्यामा विस्तार भएको छ। अस्पतालमा हाल १७औं चिनियाँ मेडिकल टोलीले विशेषज्ञ सेवा दिइरहेको छ। स्थापनादेखि हालसम्म २९९ जना चिनियाँ मेडिकल टोलीका सदस्यले सेवा प्रदान गरिसकेको दाहालले जानकारी दिए। उनले अस्पतालको विकासमा चीनले पुर्‍याएको भौतिक, प्राविधिक तथा आर्थिक सहयोगको प्रशंसा गर्दै यसले नेपाली स्वास्थ्यकर्मीको सीप विकास र उपचार सेवाको विस्तारमा समेत योगदान गरेको बताए। दाहालले निजामती कर्मचारी अस्पताल, राष्ट्रिय आयुर्वेद अनुसन्धान तथा तालिम केन्द्र र नेपाल–चीन परम्परागत चिकित्सा केन्द्रमार्फत भइरहेको स्वास्थ्य सहकार्यको पनि चर्चा गरे। उनले भूकम्प, कोभिड–१९ महामारी तथा भोटेकोशी बाढीका बेला चीनले पुर्‍याएको सहयोगप्रति आभार व्यक्त गरे। चिनियाँ चिकित्सकको सेवाभाव र समर्पणको प्रशंसा गर्दै उनले वृत्तचित्रले नेपाल–चीन मित्रता र स्वास्थ्य सहकार्यलाई जीवन्त रूपमा प्रस्तुत गरेको बताए।