काठमाडौं । आफ्नै मोटरसाइकल नहुँदा राइड सेयरिङ तथा डेलिभरी सेवामा काम गर्न चाहेर पनि अवसरबाट वञ्चित भइरहेका युवालाई लक्षित गर्दै आरवाईडी नेपालले बाइक भाडा सेवा सञ्चालन गर्दै आएको छ । ठूलो रकम खर्च गरेर बाइक खरिद गर्न नसक्ने युवालाई न्यून भाडादरमा मोटरसाइकल उपलब्ध गराई स्वरोजगार बन्न सहयोग गर्ने उद्देश्यले कम्पनीले सेवा विस्तार गरिरहेको हो । आरवाईडी नेपालले हिरो सुपर स्प्लेन्डर १२५ सीसीका नयाँ मोटरसाइकल दैनिक ८ सय रुपैयाँ भाडामा उपलब्ध गराउँदै आएको छ । कम्पनीका अनुसार बाइक लिन बैंक ऋण, डाउन पेमेन्ट वा क्रेडिट जाँच आवश्यक पर्दैन । नागरिकता, सवारी चालक अनुमतिपत्र र एक जना साक्षीको नागरिकता उपलब्ध गराएर सेवा लिन सकिन्छ । बाइक भाडामा लिन सुरुमा ८ हजार ५ सय रुपैयाँ धरौटी बुझाउनुपर्ने व्यवस्था रहेको कम्पनीकी कन्टेन्ट क्रिएटर समीक्षा आचार्यले जानकारी दिइन् । कम्पनीले बाइक भाडामा लिने नयाँ राइडरलाई आवश्यक सामग्रीसमेत उपलब्ध गराउँदै आएको छ । राइडरलाई हेल्मेट, मोबाइल होल्डर, रेनकोट र १ हजार ५ सय रुपैयाँ बराबरको पेट्रोल स्वागत सुविधाका रूपमा दिइने आचार्यले बताइन् । मौसमका कारण राइडरको काम प्रभावित नहोस् भन्ने उद्देश्यले वर्षायाममा रेनकोट र चिसो मौसममा प्रयोग गर्न मिल्ने चेस्ट कभरसमेत उपलब्ध गराइएको उनको भनाइ छ । आरवाईडी नेपालको विशेषता बाइक भाडामा उपलब्ध गराउनुमा मात्र सीमित छैन । कम्पनीले लामो समयसम्म एउटै बाइक प्रयोग गर्ने राइडरलाई आफ्नै सवारीको मालिक बन्न सक्ने ‘रेन्ट टु वन’ योजना पनि अघि सारेको छ । उक्त योजनाअन्तर्गत १८ महिनासम्म भाडा भुक्तानी गरेपछि बाइक राइडरकै नाममा हस्तान्तरण गर्ने व्यवस्था रहेको कम्पनीले जनाएको छ । आरवाईडी नेपालका सञ्चालक सदस्य प्रतिभ आचार्यका अनुसार यो योजनामा हालसम्म ६–७ जना राइडर आबद्ध भइसकेका छन् । लामो समयसम्म एउटै बाइक प्रयोग गर्ने राइडरलाई त्यसको स्वामित्व हस्तान्तरण गर्ने कम्पनीको योजना रहेको उनले बताए । आरवाईडी नेपालले सुरुमा दुईवटा सेकेन्ड ह्यान्ड बाइकबाट व्यवसायको सम्भावना अध्ययन गरेको थियो । राइड सेयरिङ सेवामा आबद्ध चालकलाई बाइक खरिद गर्न ठूलो रकम आवश्यक पर्ने समस्या देखेपछि साथीहरूको समूह बनाएर व्यवसाय सुरु गरिएको आचार्य बताउँछन् । करिब चार महिनाको अध्ययनपछि व्यवस्थित रूपमा व्यवसाय अघि बढाइएको उनको भनाइ छ । सुरुवाती चरणमा ५० वटा हिरो सुपर स्प्लेन्डर बाइकबाट सेवा सुरु गरेको कम्पनीले अहिले आफ्नो क्षमता विस्तार गरेको छ । कम्पनीका अनुसार हाल १२० भन्दा बढी बाइक सञ्चालनमा छन् भने ५०० भन्दा बढी सक्रिय राइडर यस सेवामा आबद्ध छन् । कम्पनीले राइडरहरूको औसत मासिक आम्दानी ४५ हजार रुपैयाँ रहेको दाबी गरेको छ । राइडरले पठाओ, इनड्राइभ, याङ्गो तथा अन्य प्लेटफर्ममा काम गरेर मासिक ३० हजारदेखि ६० हजार रुपैयाँसम्म आम्दानी गर्न सक्ने कम्पनीको भनाइ छ । यद्यपि वास्तविक आम्दानी काम गर्ने समय, यात्रुको माग, इन्धन खर्च र बाइक भाडालगायत सञ्चालन खर्चमा निर्भर रहनेछ । राइडरलाई थप प्रोत्साहन गर्न कम्पनीले रेफरल अफरसमेत सञ्चालन गरेको छ । आरवाईडी नेपालमा नयाँ राइडर आबद्ध गराउन सहयोग गर्ने पुराना राइडरलाई १ हजार ५ सय रुपैयाँ बराबरको पेट्रोल उपलब्ध गराउने व्यवस्था गरिएको आचार्यले जानकारी दिए । कम्पनीले राइडरलाई २४ सै घण्टा बाइक प्रयोग गर्न दिने व्यवस्था गरेको छ । तर, कम्पनीको सर्तअनुसार बाइक काठमाडौं उपत्यकाबाहिर लैजान भने पाइँदैन । बाइकको नियमित मर्मतसम्भार र प्राविधिक समस्या समाधानका लागि कम्पनीले आफ्नै एसटीआर ग्यारेजसमेत सञ्चालनमा ल्याएको छ । बैंक ऋण वा ठूलो रकम खर्च गरेर मोटरसाइकल खरिद गर्न नसक्ने युवाका लागि भाडामा बाइक लिएर आम्दानी सुरु गर्ने विकल्पका रूपमा आरवाईडी नेपालले आफ्नो सेवा अघि बढाएको छ ।
बाइक नहुने युवालाई स्वरोजगार बनाउँदै आरवाईडी नेपाल, भाडाबाटै कमाइदेखि मालिक बन्ने अवसरसम्म

Read Complete Original Article
Published originally on केन्द्रबिन्दु






