काठमाडौं । लगातार दुई संस्करणको फाइनल पुगेर पनि उपाधिबाट वञ्चित सुदूरपश्चिम रोयल्सले तेस्रो प्रयासमा नेपाल प्रिमियर लिग (एनपिएल) को ट्रफी उचालेको छ । पहिलो संस्करणदेखि नै उपाधि दाबेदार रहँदै आएको टोलीले लगातार तीनपटक फाइनल खेलेर अन्ततः आफ्नो लक्ष्य पूरा गरेको हो । कीर्तिपुरस्थिति त्रिवि क्रिकेट रंगशालामा साबिक विजेता लुम्बिनी लायन्सलाई १० विकेटले हराउँदै सुदूरपश्चिमले पहिलोपटक एनपिएल च्याम्पियन बनेर इतिहास रचेको हो । एनपिएलको पहिलो संस्करणमा सुदूरपश्चिमले आफूलाई बलियो टोलीका रूपमा स्थापित गरेको थियो । लिग चरणमा शीर्ष स्थानमा रहेको उसले पहिलो क्वालिफायरमा जनकपुर बोल्ट्सलाई हराउँदै फाइनलमा स्थान बनाएको थियो । तर, निर्णायक खेलमा जनकपुरसँग पाँच विकेटले पराजित भएपछि टोली उपविजेतामा सीमित भयो । दोस्रो संस्करणमा पनि सुदूरपश्चिमको प्रदर्शन उत्कृष्ट रह्यो । लिग चरणमा शीर्ष स्थानमा रहेर पहिलो क्वालिफायर खेलेको टोलीले विराटनगर किंग्सलाई हराउँदै लगातार दोस्रोपटक फाइनलमा स्थान बनायो । तर, उपाधि भिडन्तमा लुम्बिनी लायन्ससँग पराजित भएपछि लगातार दोस्रोपटक उपविजेतामै चित्त बुझाउनुपर्यो । तेस्रो संस्करणमा सुदूरपश्चिमको सुरुवात पनि सहज रहेन । पहिलो खेलमै लुम्बिनीसँग पराजित भएको टोलीले तेस्रो खेलमा विराटनगरलाई हराउँदै पुनरागमन गरेको थियो । त्यसपछि लिग चरणमा लगातार चार खेल जित्दै प्लेअफमा स्थान बनायो । लिग चरणमा दोस्रो भएको सुदूरपश्चिम पहिलो क्वालिफायरमा फेरि लुम्बिनीसँग पराजित भयो । तर, दोस्रो अवसरको सदुपयोग गर्दै दोस्रो क्वालिफायरमा चितवन राइनोजलाई हराएर लगातार तेस्रोपटक फाइनलमा पुग्यो । फाइनलमा फेरि प्रतिद्वन्द्वी लुम्बिनी नै थियो । अघिल्लो संस्करणको फाइनलमा बेहोरेको हार र यस सिजन लिग चरण तथा पहिलो क्वालिफायरमा भोगेका पराजयको बदला लिने अवसर सुदूरपश्चिमसँग थियो । यसपटक भने टोलीले कुनै गल्ती गरेन र उपाधि उचालेरै छाड्यो । नायक बने मन्सीटस जितेर पहिले बलिङ रोजेको सुदूरपश्चिमले लुम्बिनीलाई १५५ रनमा सीमित गरेको थियो । जवाफमा १५६ रनको लक्ष्य सुदूरपश्चिमले १३.३ ओभरमै कुनै विकेट नगुमाई पूरा गरेको हो । सुदूरपश्चिमको जितका नायक बने जर्ज मन्सेले ४९ बलमै शतक पूरा गर्दै लुम्बिनीको बलिङ आक्रमणलाई तहसनहस पार्नुभयो । कुल ५४ बल खेल्नुभएका उहाँले अविजित १२५ रन बनाउनुभयो । यसक्रममा उहाँले एनपिएल इतिहासकै सर्वाधिक व्यक्तिगत स्कोरको कीर्तिमान पनि बनाउनुभयो । अर्का ओपनर विनोद भण्डारीले पनि मन्सेलाई उत्कृष्ट साथ दिनुभयो । उहाँले २७ बलमा अविजित ३० रन बनाउनुभयो । सुदूरपश्चिमले सुरुदेखि नै आक्रामक खेल देखाएको थियो । मन्सेको ब्याटबाट लगातार चौका र छक्का निस्किरहँदा लुम्बिनीका बलर दबाबमा परेका थिए । पहिले ब्याटिङ गरेको लुम्बिनीले सुरुवातमै दबाब झेलेको थियो । ओपनर डार्सी सर्ट र आशिफ शेखले पहिलो ओभरमा एक रन मात्र बनाउन सके । आशिफ तेस्रो ओभरमा स्कट कुगलेइनको बलमा एलबिडब्ल्यु आउट हुनुभयो । उहाँले एक रन मात्र बनाउनुभयो । सर्टले १८ बलमा चार चौकासहित २१ रन जोड्नुभयो । निरोशन डिकवेलाले १७ बलमा २८ रन बनाउनुभयो । कप्तान रोहित पौडेलले ३० रन जोड्नुभयो । सन्दीप जोरा चार रनमा आउट हुनुभयो । मध्यक्रममा लुम्बिनीले ठूलो साझेदारी गर्न सकेन । दिलिप नाथ र अली शेखले छैटौँ विकेटका लागि ३३ रन जोड्नुभयो । अलीले १२ बलमा दुई चौका र दुई छक्कासहित २४ रन बनाउनुभयो । दिलिप नाथ ३१ बलमा तीन छक्कासहित ३९ रनमा अविजित रहनुभयो । रुबेन ट्रम्पलम्यान चार रनमा अविजित रहनुभयो । सुदूरपश्चिमका स्कट कुगलेइनले दुई विकेट लिनुभयो । थरिन्दु रत्नायके र दीपेन्द्रसिंह ऐरीले एक-एक विकेट लिए । अनिल खरेल र इसन पाण्डे भने महँगा सावित भए । खरेलले दुई ओभरमा २५ र पाण्डेले दुई ओभरमा ३० रन खर्चिनुभयो । दुवैले विकेट लिन सकेनन् । मैदानमा उपस्थित हजारौँ दर्शकका अगाडि सुदूरपश्चिमले जितको खुसी मनाउँदा लुम्बिनीको लगातार दोस्रो उपाधि जित्ने सपना अधुरै रह्यो । जर्ज मन्सेको विस्फोटक शतक र सुदूरपश्चिमको एकपक्षीय प्रदर्शनसँगै ‘फेस्टिभल अफ हिमालयज’को नारासहित अघि बढेको एनपिएलले नयाँ च्याम्पियन जन्माएको छ । यससँगै एनपिएलका तीन संस्करणमा तीन फरक टोली च्याम्पियन बनेका हुन् । कीर्तिमानी बन्यो तेस्रो संस्करणएनपिएलको तेस्रो संस्करणमा मन्सेको शतकले नयाँ कीर्तिमान थप्यो । उहाँको १२५ रन प्रतियोगिताकै व्यक्तिगत उच्च स्कोर हो । यसअघि चितवन राइनोजका कमिल मिसाराले बनाएको १२० रन उच्च स्कोर थियो । मन्सेको शतक एनपीएल फाइनलमा बनेको पहिलो शतक पनि हो । फाइनलमा सुदूरपश्चिमले निकालेको १० विकेटको जित पनि प्रतियोगिताको इतिहासकै सबैभन्दा ठूलो जित बन्यो । पहिलो संस्करणमा जनकपुरले पाँच विकेट र दोस्रो संस्करणमा लुम्बिनीले ६ विकेटको जित निकालेका थिए । तेस्रो संस्करणमा सर्वाधिक स्कोरको कीर्तिमान पनि बनेको छ । पोखरा एभेन्जर्सले काठमाडौं गोर्खाजविरुद्ध तीन विकेट गुमाएर २२४ रन बनायो । यो एनपिएल इतिहासकै सर्वाधिक स्कोर हो । यसअघि विराटनगर किंग्सले दोस्रो संस्करणमा पोखराविरुद्ध बनाएको २२० रनको कीर्तिमान थियो । पोखराले कर्णाली याक्सविरुद्ध पनि २१७ रन बनायो । चितवन राइनोजले काठमाडौं गोर्खाजविरुद्ध २०४ रन जोड्यो । एउटै संस्करणमा तीनपटक दुई सयभन्दा बढी रन बनेको यो पहिलो अवसर हो । एनपिएल इतिहासमा हालसम्म पाँचपटक दुई सयभन्दा ठूलो स्कोर बनेको छ । त्यसमध्ये पोखराले मात्र तीनपटक यस्तो उपलब्धि हासिल गरेको छ । यस संस्करणमा १९ खेलाडीले २७ अर्धशतक बनाए । सुदूरपश्चिमका कप्तान दीपेन्द्रसिंह ऐरीले सर्वाधिक तीन अर्धशतक प्रहार गर्नुभयो । पोखराका युवराजसिंह सामरा, चितवनका डेविड मलान, काठमाडौंका रासिद खान र कुशल भुर्तेल, चितवनका रवि बोपरा तथा विराटनगरका लोकेश बमले दुई-दुई अर्धशतक बनाए । तर कम रन बन्ने खेल पनि धेरै रहे । विराटनगर किंग्स काठमाडौं गोर्खाजविरुद्ध १८.३ ओभरमा ८३ रनमै अलआउट भयो । तुलनात्मक रूपमा कम स्कोर बनेपछि कीर्तिपुरको पिचलाई लिएर स्वदेशी तथा विदेशी खेलाडीले असन्तुष्टि जनाए । ब्याटिङ सहज बनाउन पिच सुधार्नुपर्ने सुझाव पनि दिए । प्रविधि र अन्तर्राष्ट्रिय मान्यताको नयाँ अध्यायतेस्रो संस्करणमा पहिलोपटक निर्णय पुनरावलोकन प्रणाली (डिआरएस) प्रयोग गरियो । अम्पायरको निर्णयमा असहमति भए खेलाडीले पुनरावलोकन माग गर्न पाए । एलबिडब्ल्युका लागि थ्रिडी बल ट्र्याकिङ प्रयोग गरियो । रनआउट, स्टम्पिङ र नो बलसम्बन्धी निर्णयमा पनि पुनरावलोकनको व्यवस्था थियो । प्रविधिले अम्पायरका निर्णय पुनः परीक्षण गर्न सहयोग गर्यो । यसले खेललाई थप प्रतिस्पर्धात्मक र निष्पक्ष बनाउन मद्धत पुर्यायो । अधिकांश खेल फ्लडलाइटमा खेलाइयो । उद्घाटन र फाइनल खेल पनि दिवा-रात्रि स्वरूपमा सम्पन्न भए । यसै संस्करणदेखि एनपीएलले अन्तर्राष्ट्रिय क्रिकेट परिषद् (आइसिसी) बाट आधिकारिक टी-२० मान्यता पायो । मान्यता पाएसँगै फ्रेन्चाइज टोलीलाई विदेशी खेलाडी अनुबन्ध गर्न सहज भयो । प्रतियोगिताको अन्तर्राष्ट्रिय पहिचान विस्तार गर्ने दिशामा यो महत्त्वपूर्ण कदम बन्यो । तेस्रो संस्करणमा आठ टोली सहभागी थिए । फाइनल हेर्न त्रिवि क्रिकेट मैदानमा उल्लेख्य दर्शक उपस्थित थिए । राष्ट्रिय स्वतन्त्र पार्टीका सभापति रवि लामिछाने, गृहमन्त्री सुधन गुरुङ, शिक्षामन्त्री सस्मित पोखरेल र पूर्वप्रधानमन्त्री बाबुराम भट्टराईलगायत उच्चपदस्थ व्यक्तिहरू पनि मैदान पुगेका थिए । रिजन सिजनकै सर्वोत्कृष्ट खेलाडी, अरू कसले कुन पुरस्कार पाए ?एनपिएल सिजन-३ मा चितवन राइनोजका बलर रिजन ढकाल सर्वोत्कृष्ट नेपाली खेलाडी घोषित हुनुभयो । प्रतियोगितामा सर्वाधिक १७ विकेट लिनुभएका उहाँले सर्वोत्कृष्ट नेपाली खेलाडी बन्दै ओमोडा एण्ड जाएको कार पुरस्कार पाउनुभयो । रिजनले उत्कृष्ट बलर घोषित हुँदै पल्सर मोटरसाइकल पनि जित्नुभयो । उहाँको टिम चितवन प्लेअफ पुगे पनि फाइनल भने पुग्न सकेन । चितवन तेस्रो भयो । यस्तै, प्लेअर अफ दि टुर्नामेन्ट सुदूरपश्चिम रोयल्सका कप्तान दीपेन्द्र सिंह ऐरी घोषित हुनुभयो । उहाँले प्रतियोगितामा तीन अर्धतकसहित २१८ रन बनाउनुका साथै ६ विकेट लिनुभयो । उहाँले ५ लाख रुपैयाँ पुरस्कार तित्नुभयो । यस्तै, इनर्जेटिक प्लेयर चितवन राइनोजका श्रीलंकन ब्याटर कमिल मिशारा घोषित हुनुभयो । उहाँले नगद २ लाख हात पानुभयो । प्रतियोगिताको सर्वोत्कृष्ट ब्याटर विराटगर किंग्सका लोकेश बम घोषित हुनुभयो । उहाँले पनि पल्सर बाइक प्राप्त गर्नुभयो । यसैगरी, जनकपुर बोल्ट्सका युवा बलर राहुल यादवले इमर्जिङ प्लेअरको अवार्डमा पल्सर मोटरसाइकल जित्नुभयो । सुदूरपश्चिमलाई १० विकेटको जितसहित च्याम्पियन बनाउन सहयोग गर्नुभएका जर्ज मन्से फाइनल खेलको प्लेयर अफ द म्याच घोषित हुनुभयो । यसअघि पहिलो सिजनमा दीपेन्द्र सिंह ऐरीले तथा दोस्रो सिजनमा रोहित पौडेलले कार हात पारेका थिए । उपविजेता लुम्बिनी लायन्सले स्प्रिट अफ क्रिकेटको अवार्ड प्राप्त गर्यो । फ्लड लाइटसहितका आठवटा क्रिकेट रंगशाला बनाउने प्रधानमन्त्रीको घोषणाप्रधानमन्त्री बालेन्द्र शाह (बालेन)ले एनपिएलका आठवटै क्लबका आफ्नै फ्लड लाइटसहितका क्रिकेट रंगशाला निर्माण गर्ने घोषणा गर्नुभएको छ । एनपिएल फाइनल सकिएलगत्तै प्रधानमन्त्री शाहले फेसबुकमार्फत आठवटै शहरमा फ्लड लाइटसहितका आठवटा होमग्राउण्ड बनाउने घोषणा गर्नुभएको हो । प्रधानमन्त्री शाहले एनपिएलको छैटौँ संस्करणदेखि होम एण्ड अवे प्रणालीमा प्रतियोगिता सञ्चालन गर्नेगरी रंगशाला निर्माण गरिने जानकारी दिनुभयो । उहाँका अनुसार क्रिकेट रंगशालाहरू नेपाल सरकारको पूर्वाधार विकास मन्त्रालयले निर्माण गर्नेछ । सुदूरपश्चिममा फाप्ला क्रिकेट रंगशालाको निर्माण प्रक्रिया अघि बढिसकेको र आगामी तीन महिनाभित्र सबै रंगशालाको निर्माण प्रक्रिया अघि बढाइने उहाँले बताउनुभयो । यस्तै, विराटनगर किंग्सका लागि बैजनाथपुर क्रिकेट रंगशाला, लुम्बिनी लायन्सका लागि सिद्धार्थ क्रिकेट रंगशाला, कर्णाली याक्सका लागि सुर्खेत क्रिकेट रंगशाला र काठमाडौं गुर्खाजका लागि कीर्तिपुर क्रिकेट मैदान घरेलु मैदान हुने प्रधानमन्त्री शाहले उल्लेख गर्नुएको छ ।
‘फेस्टिभल अफ हिमालयज’मा फेरि नयाँ च्याम्पियन

Read Complete Original Article
Published originally on हिमालय टाइम्स






