प्रियागोल्डका सबै बिस्कुटको आयातमा रोक, बजारबाट फिर्ता गर्न निर्देशन

काठमाडौँ । मानव उपभोगका लागि अयोग्य चोकर प्रयोग गरिएको पाइएपछि भारतीय ब्रान्ड प्रियागोल्डका बिस्कुट तथा अन्य बिस्कुटजन्य उत्पादनको आयात स्वीकृति नेपालमा स्थगन गरिएको छ। खाद्य प्रविधि तथा गुण नियन्त्रण विभागले उपभोक्ताको स्वास्थ्य सुरक्षालाई ध्यानमा राख्दै भारतको सूर्या फुड एन्ड एग्रो लिमिटेडद्वारा उत्पादित प्रियागोल्ड ब्रान्डका उत्पादनको आयातमा रोक लगाउनुका साथै बजारमा बिक्रीका लागि पठाइएका उत्पादन फिर्ता गर्न निर्देशन दिएको हो। भारतको खाद्य सुरक्षा तथा मानक प्राधिकरणले कम्पनीको उद्योगमा गरेको विशेष निरीक्षणका क्रममा बिस्कुटमा फाइबरको स्रोत बढाउन पशु आहारका रूपमा प्रयोग हुने चोकर मिसाइएको पाइएको विवरण सार्वजनिक भएको थियो। निरीक्षणका क्रममा चोकर राखिएका जुटका बोरामा ‘गाईवस्तुको दानाका लागि मात्र’ र ‘मानव उपभोगका लागि होइन’ भन्ने उल्लेख रहेको जनाइएको छ। त्यसैगरी, उद्योगमा सरसफाइ, कीरा नियन्त्रण, कच्चा पदार्थको भण्डारण, कर्मचारीको व्यक्तिगत स्वच्छता तथा कारखानाको मर्मतसम्भारमा समेत गम्भीर कमजोरी भेटिएको बताइएको छ। यी कैफियतपछि भारतीय नियामक निकायले कम्पनीको उत्पादन इजाजतपत्र निलम्बन गर्दै कानुनी प्रक्रिया अघि बढाएको जनाइएको छ। भारतमा भएको कारबाहीपछि नेपालमा पनि उक्त ब्रान्डका बिस्कुटको आयात रोक्ने, सीमा नाकाबाट प्रवेश निषेध गर्ने तथा बजारमा उपलब्ध उत्पादन फिर्ता गराउने प्रक्रिया अघि बढाइएको हो।