काठमाडौं । कोशी प्रदेशका मुख्यमन्त्री हिक्मतकुमार कार्कीले प्रदेश सरकारले सार्वजनिक–निजी साझेदारी (पीपीपी) मोडलमार्फत विकास निर्माणका आयोजना अघि बढाउने बताएका छन् । बुधबार उदयपुरको त्रियुगा नगरपालिका–६, जलजलेस्थित यातायात व्यवस्था सेवा कार्यालयको नवनिर्मित १३ कोठे भवन उद्घाटन गर्दै मुख्यमन्त्री कार्कीले निजी क्षेत्रको लगानी भित्र्याएर ठूला पूर्वाधार तथा सेवामूलक आयोजना सञ्चालन गर्ने सरकारको योजना रहेको बताएका हुन् । उनले त्रियुगाको बरुवा बसपार्क पीपीपी मोडलमा निर्माण गर्ने प्रस्तावले प्रदेश लगानी प्राधिकरणबाट स्वीकृति पाइसकेको जनाए । प्रदेश सरकारले एक हजार किलोमिटर सडक बहुवर्षीय योजनामार्फत निर्माण तथा स्तरोन्नति गरिरहेको र सयौँ पक्की तथा झोलुङ्गे पुल निर्माण गरेको दाबी गर्दै उनले प्रदेश सरकारको औचित्य कामबाटै पुष्टि हुँदै गएको उल्लेख गरे । कोशी प्रदेश सरकारले २०७९ माघ १४ गते ४२ लाख रुपैयाँ बजेट विनियोजन गरी निर्माण सुरु गरेको उक्त भवन पटक–पटकको बजेट विनियोजनपछि झन्डै एक करोड रुपैयाँको लागतमा सम्पन्न भएको हो। यसअघि सदरमुकाम गाईघाटस्थित भाडाको घरबाट सञ्चालन हुँदै आएको कार्यालय अब आफ्नै १३ कोठे भवनबाट सेवा प्रवाह गर्न थालेको छ ।
पीपीपी मोडलमार्फत विकास निर्माणका आयोजना अघि बढाउँछौं -मुख्यमन्त्री कार्की
Read Complete Original Article
Published originally on केन्द्रबिन्दु
