‘पाँच पाण्डव’मा भीमसेनको भूमिकामा जितु

काठमाडौं । यही कात्तिक २० गतेदेखि प्रदर्शनमा आउने चलचित्र ‘पाँच पाण्डव’मा अभिनेता जितु नेपाल भीमसेनको भूमिकामा देखिने हुनुभएको छ । निर्देशक वसन्त निरौलाको निर्देशनमा बनेको चलचित्रमा जितुले इँटाभट्टाका मजदुरको चरित्र निर्वाह गर्नुभएको छ । उहाँले आफू पूर्णरूपमा महाभारतका भीम नभई पाण्डवको प्रतीकात्मक चरित्रमा प्रस्तुत भएको बताउनुभएको छ । चलचित्रमा जितुका साथै हरिवंश आचार्य, दीपाश्री निरौला, महेश त्रिपाठी, आर्यन सिग्देल, सुशील सिटौला, विनोद न्यौपाने, इभा गिरीलगायतका कलाकारको अभिनय छ । जितु र दीपाश्रीले चलचित्रमा श्रीमान्-श्रीमतीको भूमिका निर्वाह गर्नुभएको छ । जितुले हरिवंश आचार्यसँग पहिलोपटक पर्दा साझा गर्न पाउँदा फरक अनुभव भएको बताउनुभयो । चलचित्रमा कमेडी पनि रहने भए पनि कथाले मागेनुसार सबै कलाकारका फरक पक्ष प्रस्तुत हुने उहाँको भनाइ छ । सुशील पौडेलको कथा, पटकथा तथा संवाद रहेको चलचित्र सामाजिक विषयवस्तुमा आधारित छ । महाभारतका पाँच पाण्डवका चरित्र र बिम्बमार्फत समकालीन नेपाली समाजको कथा प्रस्तुत गर्न खोजिएको लेखक पौडेलले बताउनुभयो । काली रानी फिल्मस्को ब्यानरमा निर्माण भएको चलचित्रकी निर्माता काली रानी श्रेष्ठ हुनुहुन्छ भने नवीन श्रेष्ठ प्रस्तुतकर्ता रहनुभएको छ । चलचित्रको छायांकन श्याम तामाङ, सम्पादन सुप्रिम पराजुली र संगीत अर्जुन पोखरेलको छ । चलचित्रलाई आरआर फिल्मस्ले देशव्यापी वितरण गर्नेछ । यस्तै, अभिनेत्री दीपाश्री निरौला चलचित्र ‘पाँच पाण्डव’मा फरक र सशक्त भूमिकामा देखिने हुनुभएको छ । चलचित्रमा उहाँले भीमकी श्रीमती ‘सितर्नी’को भूमिका निर्वाह गर्नुहुनेछ । दीपाश्रीका अनुसार यस चलचित्रमा उहाँको चरित्र अन्यायविरुद्ध लड्ने साहसी महिलाको छ । मजदुरमाथि अन्याय हुँदा प्रतिकारमा उत्रिने र श्रीमान्को सुरक्षाका लागि उभिने भूमिकामा आफू प्रस्तुत भएको उहाँले बताउनुभएको छ । आफ्नो प्रवेशका दृश्यले दर्शकबाट ताली र हुटिङ पाउने विश्वास पनि उहाँले व्यक्त गर्नुभएको छ ।