पाँचौँ मंकाः खलः चेस च्याम्पियनसिपको उपाधि रुपेशलाई

ललितपुर । रौतहटका सिएम रुपेश जैसवाल पाँचौँ नेपालभाषा मंकाः खलः यल खुला फिडे ब्लिट्ज रेटिङ चेस च्याम्पियनसिप २०८३ को विजेता बन्नुभएको छ । ललितपुरमा सम्पन्न एकदिने प्रतियोगितामा उत्कृष्ट प्रदर्शन गर्दै जैसवालले उपाधिसहित नगद १० हजार रुपैयाँ हात पार्नुभएको हो । प्रतियोगितामा समान अंक प्राप्त गर्नुभएका जैसवालले बुकोल्स टाइब्रेकका आधारमा काठमाडौंका युवा सिएम पुरुषोत्तम सिलवाललाई पछि पार्दै पहिलो स्थान हासिल गर्नुभएको हो । सिलवाल दोस्रो हुँदै ६ हजार रुपैयाँ पुरस्कार प्राप्त गर्न सफल हुनुभयो । त्यस्तै, ललितपुरका एआईएम अभिक शाह तेस्रो हुनुभयो । उहाँले पाँच हजार रुपैयाँ प्राप्त गर्नुभयो । ललितपुर स्पोर्ट्स क्लबको प्राविधिक सहयोगमा सम्पन्न प्रतियोगितामा सुनसरीका मुहान नरसिंह श्रेष्ठ चौथो हुँदै चार हजार रुपैयाँ, मकवानपुरका एफएम क्षितिज भण्डारी पाँचौँ हुँदै तीन हजार पाँच सय रुपैयाँ तथा काठमाडौंका शुभदीप थापा छैटौँ हुँदै तीन हजार रुपैयाँ पुरस्कार प्राप्त गर्नुभयो । त्यसैगरी पाँचथरका रिसोन थापा सातौँ, काठमाडौंका बद्रीलाल नेपाली आठौँ, दोलखाका आशिष फुयाल नवौँ र काठमाडौंका सजल न्यौपाने दसौँ हुनुभयो । उहाँहरूले जनही दुई हजार पाँच सय रुपैयाँ पुरस्कार पाउनुभयो । विधागततर्फ उत्कृष्ट महिला खेलाडीमा खोटाङकी कुसुम घिसिङ प्रथम, ललितपुरकी त्रिसरा लामा दोस्रो र साँखुकी अन्शी जोशी तेस्रो हुनुभयो । उहाँहरूले क्रमशः दुई हजार, एक हजार पाँच सय र एक हजार रुपैयाँ पुरस्कार प्राप्त गर्नुभयो । अन्य विधागत पुरस्कारतर्फ ५५ वर्षमाथिका उत्कृष्ट भेट्रानमा ललितपुरका कृष्णमान महर्जन, १८०० रेटिङमुनि मोरङका प्रेम खड्का, १६०० रेटिङमुनि राजेन्द्र श्रेष्ठ, यु–१६ तर्फ ललितपुरका प्रलेश महर्जन, यु–१४ तर्फ काठमाडौंका प्रबिर केसी, यु–१२ तर्फ पाल्पाका अग्रिम सैंजु तथा उत्कृष्ट स्थानीय खेलाडीमा ललितपुरका सुरोज महर्जन घोषित हुनुभयो । उहाँहरू प्रत्येकले दुई हजार रुपैयाँ पुरस्कार प्राप्त गर्नुभयो । न्हूदँ समारोह समिति ११४७ को तत्त्वावधान तथा नेपालभाषा मंकाः खलः यलको संयोजनमा आयोजित प्रतियोगिता तीन मिनेट दुई सेकेन्ड इन्क्रिमेन्ट समय नियन्त्रणमा नौ चरणको स्विस लिग प्रणालीअनुसार सञ्चालन गरिएको थियो । प्रतियोगिताको कुल नगद पुरस्कार राशि ६० हजार रुपैयाँ रहेको आयोजकले जनाएको छ । पुरस्कार वितरण समारोहमा ललितपुर महानगरपालिका वडा नं. ७ का अध्यक्ष कुलबहादुर महर्जनले न्हूदँ कार्यक्रमअन्तर्गत बुद्धिचाल प्रतियोगिताले युवा खेलाडीलाई खेलप्रति आकर्षित र उत्प्रेरित गरेको बताउनुभयो । उहाँले खेलकुदप्रति नगरपालिका सकारात्मक रहेको उल्लेख गर्दै यस्ता प्रतियोगिताले स्थानीय खेलकुदको विकासमा योगदान पुर्‍याउने धारणा राख्नुभयो ।