पर्वतमा राजनीतिक भेटघाटमा सक्रिय विद्वान गुरुङ, पार्टी एवं स्थानीय र प्रदेश निर्वाचनबारे छलफल

पर्वत। नेपाली कांग्रेसका केन्द्रीय सदस्य एवं युवा नेता विद्वान गुरुङले पर्वतको कुश्मा नगरपालिकाका विभिन्न वडाका वर्तमान तथा निवर्तमान वडा सभापतिहरूसँग भेटघाट तथा छलफल गर्नुभएको छ। नेपाली कांग्रेस कुश्मा नगर कार्यसमितिका सभापति सुरेन्द्र केसीको पहलमा आयोजित उक्त भेटघाटमा कुश्मा नगरपालिकाका वडा नम्बर ९, १०, ११, १२ र १४ का वर्तमान तथा निवर्तमान वडा सभापतिहरूको सहभागिता रहेको थियो। भेटघाटका क्रममा केन्द्रीय सदस्य गुरुङले पार्टीको समसामयिक राजनीतिक अवस्था, संगठनको वर्तमान गतिविधि तथा आगामी राजनीतिक कार्यदिशाका विषयमा छलफल गर्नुभएको थियो। विशेषगरी आगामी स्थानीय तह तथा प्रदेशसभा निर्वाचनलाई लक्षित गर्दै पार्टीको संगठन सुदृढीकरण, नेता–कार्यकर्ताबीचको आपसी समन्वय र निर्वाचनको तयारीलगायतका विषयमा अनौपचारिक विचारविमर्श भएको बताइएको छ। पार्टीको केन्द्रीय नेतृत्व र स्थानीय तहमा क्रियाशील नेता तथा कार्यकर्ताबीचको सम्बन्धलाई थप सुमधुर बनाउँदै संगठनलाई थप गतिशील र प्रभावकारी बनाउन यस्ता भेटघाटले महत्वपूर्ण भूमिका खेल्ने अपेक्षा गरिएको छ। नेपाल तरुण दलको विभिन्न जिम्मेवारीमा रहेर लामो समय संगठन निर्माण र युवा परिचालनमा सक्रिय रहनुभएका गुरुङ नेपाली कांग्रेसको १५औँ महाधिवेशनबाट खुला केन्द्रीय सदस्यमा निर्वाचित हुनुभएको हो। पार्टीको केन्द्रीय जिम्मेवारीमा पुगेपछि पनि स्थानीय तहका नेता तथा कार्यकर्तासँग निरन्तर संवाद र भेटघाटलाई प्राथमिकता दिनुभएको उहाँको यो भेटघाटलाई पर्वतको पार्टी संगठनसँगको समन्वय र आगामी निर्वाचनको तयारीका दृष्टिले अर्थपूर्ण रूपमा हेरिएको छ।