नेपाल संवत् र म्हः पूजाले नयाँ आशा र आत्मविश्वास प्रदान गरोस् : गगन थापा

काठमाडौं । नेपाली कांग्रेसका सभापति गगन थापाले नेपाल संवत् ११४७ तथा म्हः पूजाको अवसरमा सम्पूर्ण नेपालीमा सुख, शान्ति, समृद्धि र सुस्वास्थ्यको शुभकामना व्यक्त गर्नुभएको छ । मंगलबार सामाजिक सञ्जाल फेसबुकमार्फत शुभकामना सन्देश जारी गर्दै सभापति थापाले नेपाल संवत् नेपालको मौलिक पहिचान, समृद्ध संस्कृति र गौरवशाली परम्पराको प्रतीक भएको बताउनुभएको छ । लोककल्याण र परोपकारको प्रेरणादायी विरासत बोकेको नेपाल संवत्को नयाँ वर्षले सबैको जीवनमा नयाँ आशा, उत्साह, सुख, शान्ति र समृद्धि ल्याउने विश्वास उनले व्यक्त गर्नुभएको छ । थापाले म्हः पूजाले प्रत्येक व्यक्तिमा आत्मसम्मान, सकारात्मक ऊर्जा, सुस्वास्थ्य र नयाँ आत्मविश्वास प्रदान गरोस् भन्ने कामना गर्नुभएको छ । साथै, आपसी सद्भाव, आत्मीयता र एकतालाई अझ प्रगाढ बनाउँदै लैजानुपर्नेमा जोड दिनुभएको छ । सांस्कृतिक विविधता र राष्ट्रिय एकताको भावनालाई थप बलियो बनाउँदै नेपाल संवत्को नयाँ वर्षले समुन्नत नेपालको साझा यात्रामा सबैलाई थप प्रेरणा प्रदान गर्ने विश्वाससमेत उहाँले व्यक्त गर्नुभएको छ ।