काठमाडौं । नेपाली निर्माण व्यवसायी महासंघका अध्यक्ष निकोलस पाण्डेले नेपाली निर्माण व्यवसायीको क्षमता अभिवृद्धिका लागि विकास साझेदार र सरकारी निकायसँग सहकार्यमा जोड दिनुभएको छ । उहाँले निर्माण व्यवसायीलाई आफ्नो क्षमता, सुशासन र व्यावसायिक मापदण्ड सुधार गर्दै अन्तर्राष्ट्रिय प्रतिस्पर्धाका लागि तयार रहन पनि सुझाव दिनुभयो । एसियाली विकास बैंक, विश्व बैंक र एसियन इन्फ्रास्ट्रक्चर बैंकले संयुक्तरूपमा काठमाडौंमा आयोजना गरेको ‘बिजनेस अपरच्युनिटी सेमिनार’मा बोर्ल्दै अध्यक्ष पाण्डेले साझेदार संस्थाहरूद्वारा सञ्चालित परियोजनामा निर्माण व्यवसायीको अर्थपूर्ण सहभागिता सुनिश्चित गरिनुपर्ने बताउनुभयो । समयमै गुणस्तरीय निर्माणका लागि विविध पक्षमा ध्यान पुर्याउनुपर्ने उहाँको भनाइ थियो । अध्यक्ष पाण्डेले आयोजना तथा बोलपत्रसम्बन्धी सूचना समयमै उपलब्ध गराउनुपर्ने, नेपाली निर्माण कम्पनीको वास्तविक सहभागिता र क्षमता विकास सुनिश्चित गरिनुपर्ने, जग्गा प्राप्ति, वन स्वीकृति, मूल्यवृद्धि तथा भुक्तानी ढिलाइको जोखिम निर्माण व्यवसायीमाथि मात्र थोपर्न नहुने, खरिद प्रक्रिया पारदर्शी, निष्पक्ष र वास्तविक क्षमतामा आधारित बनाउनुपर्नेलगायतका विषय महत्त्वपूर्ण भएको बताउनुभयो । मध्यपूर्वको युद्धका कारण पेट्रोलियम पदार्थमा अस्वाभाविकरूपमा भएको मूल्यवृद्धि सम्बोधन गर्न चालु आयोजनामा समेत उचित मूल्य समायोजन तथा क्षतिपूर्ति व्यवस्था गर्न पनि पाण्डेले माग गर्नुभयो । महासंघका अनुसार कार्यक्रममा सहभागी विश्व बैंक, एसियाली विकास बैंक, एसियन इन्फ्रास्ट्रक्चर बैंकका प्रतिनिधिहरूले महासंघ अध्यक्ष पाण्डेले उठान गर्नुभएका विषय नेपालका सन्दर्भमा अत्यन्त सान्दर्भिक भएको धारणा राखेका थिए । कार्यक्रममा पूर्वाधार क्षेत्रमा क्रियाशील व्यवसायी, परामर्शदातालगायतको सहभागिता थियो । यसैबीच नेपाल निर्माण व्यवसायी महासंघको आयोजनामा सार्वजनिक खरिद प्रक्रियासँग सम्बन्धित ‘विद्युतीय सरकारी खरिद प्रणाली’ (ई-जिपी) सम्बन्धी दुर्ईदिने तालिम काठमाडौंमा सुरु भएको छ । आइतबारसम्म सञ्चालन हुने तालिम उद्घाटन गर्दै महासंघका वरिष्ठ उपाध्यक्ष रामजी पन्तले पछिल्लो समय सार्वजनिक खरिद प्रक्रिया पूर्णरूपमा प्रविधिमैत्री बन्दै गएको बताउनुभयो । उहाँले वर्तमान सन्दर्भमा ई-जिपी प्रणालीको महत्त्व निकै बढेकाले निर्माण व्यवसायीलाई सोसम्बन्धी व्यावहारिक ज्ञान, सीप र प्राविधिक दक्षता हासिल गराउन तालिम आवश्यक रहेको बताउनुभयो । महासंघका महासचिव शिवहरि घिमिरेले तालिमले निर्माण व्यवसायीलाई विद्युतीय खरिद प्रणालीको प्रभावकारी प्रयोग गर्न, बोलपत्र प्रक्रियामा सहजरूपमा सहभागी हुन र प्रक्रियागत झन्झट तथा जटिलता समाधान गर्न मद्दत पुग्ने विश्वास गर्नुभएको थियो । तालिममा ई-जिपी प्रणाली प्रयोग, विद्युतीय बोलपत्र (ई-बिडिङ) प्रक्रिया, बोलपत्रसम्बन्धी आवश्यक कागजात तयारी तथा पेश गर्ने विधि र सार्वजनिक खरिद प्रक्रियामा ध्यान दिनुपर्ने प्राविधिक तथा प्रक्रियागत विषयहरूमा प्रशिक्षण दिइने महासंघले जनाएको छ ।
निर्माण व्यवसायीको क्षमता विकासमा जोड

Read Complete Original Article
Published originally on हिमालय टाइम्स






