नहाय खायसँगै छठ सुरु, सजाइँदै पोखरी (फोटो फिचर)

जनकपुरधाम।लोक आस्थाको महान पर्व छठ आजदेखि सुरु भएको छ। चार दिनसम्म विधि विधानसहित मनाइने छठ पर्वको पहिलो दिन आज व्रतालुहरूले ‘नहाय–खाय’ विधि गर्दैछन्। व्रतालुहरु नजिकको सरोवरहरुमा स्नान गर्ने मन्दिरहरुमा पुजापाठ गर्ने गर्छन्। छठ पर्वको पहिलो दिनलाई शरीर र मन शुद्ध गर्ने दिनका रूपमा लिइन्छ। यस विधिलाई ‘नहाय–खाय’ भनिन्छ। नहाय–खायका दिन व्रतालुहरूले ‘अरबा–अरबाइन’ खाने परम्परा छ। छठ पर्व सम्पन्न नभएसम्म मरुवा (कोदो), मसुरोको दाल, प्याज र लसुनलगायतका खानेकुरा त्याग गर्ने प्रचलन रहेको छ। छठ पर्वलाई लक्षित गर्दै जनकपुरधामसहित तराई मधेसका विभिन्न स्थानमा तयारी तीव्र पारिएको छ। स्थानीयवासीहरू पोखरी, नदी, कुवा तथा अन्य जलाशयको सरसफाइ, सजावट र व्यवस्थापनमा जुटेका छन्। छठको दोस्रो दिन शनिबार व्रतालुहरू दिनभर उपवास बसेर साँझ चामल र सक्खरबाट तयार पारिएको खीर भगवानलाई अर्पण गरी प्रसादका रूपमा ग्रहण गर्छन्। यस विधिलाई ‘खरना’ भनिन्छ। त्यस्तै, तेस्रो दिन आइतबार साँझ व्रतालुहरूले अस्ताउँदो सूर्यलाई अघ्र्य अर्पण गर्नेछन्। पर्वको अन्तिम दिन सोमबार बिहान उदाउँदो सूर्यलाई अघ्र्य दिएपछि छठ पर्व विधिवत् रूपमा सम्पन्न हुनेछ। बिहानीको अघ्र्यपछि व्रतालुहरूले प्रसाद ग्रहण गरी उपवास तोड्ने छन्। यस विधिलाई ‘पारण’ भनिन्छ। छठ पर्वलाई लिएर जनकपुरधामको सरोवरहरुलाई सजाउने कार्यहरु भईरहेका छन्। स्थानय विभिन्न कल्वहरुले स्थानियहरुको सहयोगमा छठको पोखरीलाई सजाउने ,सरसफाई र भव्यता प्रदान गर्ने गरेका छन्। जनकपुरधामको गंगा सागर, धनुष सागर, अरगजा ,विहार कुण्डसहितको सरोवरमा भव्य रुपमा छठ हुने गरेको छ। जसलाई अहिले सजाउने कार्यहरु भईरहेको छ। पण्डालदेखि रंगिन बत्तिहरु लगाउने कार्य भईरहेका छन्। हेर्नुस् तस्बिरहरु