नवलपरासीमा तीनवटा भारतीय मोटरसाइकल ठोक्किँदा एकको मृत्यु

काठमाडौं। नवलपरासी पश्चिमको पाल्हीनन्दन गाउँपालिका-३ बेलशपुरमा तीनवटा भारतीय मोटरसाइकल एकआपसमा ठोक्किँदा २० वर्षीय एक नेपाली युवकको मृत्यु भएको छ। बेलशपुर गोपिगञ्ज गण्डक नहरको भित्री सडकखण्डमा बिहीबार साँझ उक्त दुर्घटना भएको प्रहरीले जनाएको छ। दुर्घटनामा परी रुपन्देहीको पाल्हीनन्दन गाउँपालिका-४ लोहरौलीका २० वर्षीय उसमान पठानको मृत्यु भएको हो। यूपी ५६ एक्स ०३३४ नम्बरको मोटरसाइकलका चालक रहेका पठान गम्भीर घाइते भएका थिए। उनको जिल्ला अस्पताल परासीमा उपचारका क्रममा मृत्यु भएको प्रहरीले जानकारी दिएको छ। प्रहरीका अनुसार पूर्वबाट पश्चिमतर्फ आउँदै गरेको यूपी ३५ बीभी ९७५३ र विपरीत दिशाबाट जाँदै गरेको यूपी ५६ एक्स ०३३४ नम्बरको मोटरसाइकल सुरुमा ठोक्किएका थिए। लगत्तै पछाडिबाट आएको यूपी ५६ एक्स २९४४ नम्बरको अर्को मोटरसाइकल समेत सोही दुर्घटनामा परेको थियो। दुर्घटनामा परी रामग्राम नगरपालिका-१७ का १९ वर्षीय ईसराफिल अंसारी र ३९ वर्षीय प्रमोद तेली, तथा पाल्हीनन्दन गाउँपालिका-३ का १६ वर्षीय मोहम्मद राजा पठान र १७ वर्षीय सत्यम हरिजन घाइते भएका छन्। उनीहरूको टाउको र शरीरका विभिन्न भागमा चोट लागेको छ। घाइतेहरूको अहिले बुटवलस्थित सिद्धबाबा अस्पतालमा उपचार भइरहेको छ। प्रहरीले दुर्घटना तीव्र गतिका कारण भएको हुनसक्ने अनुमान गरेको छ। घटनामा संलग्न तीनवटै मोटरसाइकल प्रहरी नियन्त्रणमा लिइएको छ। साथै, यूपी ५६ एक्स ०३३४ नम्बरको मोटरसाइकलमा पछाडि सवार १८ वर्षीय फिरोज अली देवानलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।