दसैँ मनाउन गाउँ फर्किने बढे, काठमाडौंका सडकमा सवारी चाप घट्दै

काठमाडौं । बडादसैँ नजिकिएसँगै काठमाडौं उपत्यका छाडेर गाउँघर फर्किनेको सङ्ख्या बढेको छ । अध्ययन, रोजगारी तथा विभिन्न पेसा-व्यवसायका सिलसिलामा राजधानीमा बस्दै आएका नागरिक दसैँ मनाउन आफ्नो घर फर्किन थालेपछि उपत्यकाका सडकमा सवारी चाप घट्दै गएको हो । काठमाडौं उपत्यका ट्राफिक प्रहरी कार्यालयका अनुसार घटस्थापनादेखि असोज ३० गतेसम्म ४ लाख २३ हजार ६६४ जना यात्रुले उपत्यका छाडेका छन् । विशेषगरी असोज २५ गतेदेखि ३० गतेसम्मको अवधिमा घर फर्किने यात्रुको सङ्ख्या उल्लेख्य रूपमा बढेको ट्राफिक प्रहरीको तथ्याङ्कले देखाएको छ । तथ्याङ्कअनुसार असोज २५ गते ५२ हजार ८२७ जनाले उपत्यका छाडेका थिए । त्यस्तै, असोज २६ गते ५६ हजार ८०९, असोज २७ गते ७८ हजार १३८, असोज २८ गते ७४ हजार ९७९, असोज २९ गते ८५ हजार ५६१ र असोज ३० गते ७५ हजार ३५० जना यात्रु राजधानीबाट बाहिरिएका छन् । दसैँका लागि उपत्यका छाड्ने यात्रुको चाप बढेसँगै राजधानीभित्र सञ्चालन हुने सार्वजनिक यातायातमा यात्रुको चाप कम हुन थालेको छ । सामान्य अवस्थामा व्यस्त रहने सडकमा समेत सवारी आवागमन केही सहज बन्दै गएको छ । मध्यम तथा लामो दूरीमा सञ्चालन हुने सवारीसाधनका लागि रुट परमिट खुला गरिएपछि स्थानीय रुटमा चल्ने कतिपय सवारीसाधनसमेत यात्रु लिएर उपत्यकाबाहिर जान थालेका छन् । रिजर्भमा यात्रु ओसार्ने क्रम बढ्दा दसैँमा घर फर्किने नागरिकलाई गन्तव्यसम्म पुग्न थप सहज हुने अपेक्षा गरिएको छ । दसैँ मनाउन राजधानीबाट बाहिरिने यात्रुको सङ्ख्या बढेसँगै उपत्यकाको जनघनत्व र सवारी चापमा समेत कमी आउन थालेको छ । चाडपर्वका बेला गाउँघर फर्किने क्रमले राजधानीको व्यस्त दैनिकी केही शान्त बन्ने गरेको छ ।