तेस्रो त्रैमासमा विश्वव्यापी स्मार्टफोन ढुवानी गत वर्षको सोही अवधिको तुलनामा २० प्रतिशतले घट्यो: रिपोर्ट

अनुसन्धान संस्था ओम्डियाको नयाँ प्रतिवेदनअनुसार सन् २०२६ को तेस्रो त्रैमासिकमा विश्वव्यापी स्मार्टफोन ढुवानी गत वर्षको सोही अवधिको तुलनामा २० प्रतिशतले घटेको छ। उक्त त्रैमासिकमा उत्पादकहरूले कुल २५ करोड ४७ लाख स्मार्टफोन ढुवानी गरेका छन्। प्रतिवेदनअनुसार सन् २०१३ यताकै तेस्रो त्रैमासिकमा सबैभन्दा कम स्मार्टफोन ढुवानी भएको हो। स्मार्टफोनको मूल्य बढ्नु यसको प्रमुख कारण रहेको प्रतिवेदनमा उल्लेख छ। सामसङले ५ करोड ७८ लाख स्मार्टफोन ढुवानी गर्दै विश्वकै सबैभन्दा ठूलो स्मार्टफोन उत्पादकको स्थान कायम राखेको छ। यद्यपि, यो सङ्ख्या गत वर्षको सोही अवधिको तुलनामा ५ प्रतिशत कम हो। जीएसएमएरिनाका अनुसार एप्पल ५ करोड ६५ लाख आईफोन ढुवानी गर्दै दोस्रो स्थानमा रहेको छ। गत वर्षको सोही त्रैमासिकको तुलनामा एप्पलको ढुवानी सङ्ख्या स्थिर रहेको छ। साओमीले ३ करोड ७ लाख स्मार्टफोन ढुवानी गर्दै तेस्रो स्थान हासिल गरेको छ। यो सङ्ख्या गत वर्षको सोही अवधिको तुलनामा २९ प्रतिशत कम हो। ओप्पो २ करोड ३४ लाख स्मार्टफोन ढुवानी गर्दै चौथो स्थानमा रहेको छ। यसको ढुवानी गत वर्षको तुलनामा ३९ प्रतिशतले घटेको छ। त्यस्तै, भिभोले १ करोड ९३ लाख स्मार्टफोन ढुवानी गर्दै शीर्ष पाँचमा स्थान बनाएको छ। यो सङ्ख्या सन् २०२५ को तेस्रो त्रैमासिकको तुलनामा ३३ प्रतिशत कम हो। प्रतिवेदनअनुसार विभिन्न उपकरणका पार्टपुर्जाको अभाव भइरहेका बेला स्मार्टफोन ब्रान्डहरूले बढी नाफा हुने बजार र प्रमुख उत्पादनमा ध्यान केन्द्रित गरिरहेका छन्। बढ्दो लागत व्यवस्थापन गर्न र नाफाको मार्जिन जोगाउन उनीहरूले र्‍याम तथा स्टोरेजका विकल्पमा परिवर्तन गर्नुका साथै स्मार्टफोनका मोडेलको सङ्ख्या घटाइरहेका छन्। ओम्डियाले यस वर्ष विश्वव्यापी स्मार्टफोन ढुवानी थप १२ प्रतिशतले घट्ने अनुमान गरेको छ। सन् २०२७ मा पनि बजारमा गिरावट जारी रहने अपेक्षा गरिएको छ, यद्यपि गिरावटको गति भने कम हुने अनुमान छ। The post तेस्रो त्रैमासमा विश्वव्यापी स्मार्टफोन ढुवानी गत वर्षको सोही अवधिको तुलनामा २० प्रतिशतले घट्यो: रिपोर्ट appeared first on Technology Khabar.