तिहार, छठ र नेपाल संवत् लक्षित सुरक्षा व्यवस्था कडा, ५० हजारभन्दा बढी प्रहरी परिचालन

काठमाडौं। तिहार, छठ तथा नेपाल संवत् लक्षित सुरक्षा व्यवस्थालाई नेपाल प्रहरीले कडा बनाएको छ। चाडपर्वका क्रममा हुन सक्ने चोरी, डकैती, लुटपाट, आगलागी, कालोबजारी तथा अन्य आपराधिक गतिविधि नियन्त्रण गर्न देशभर ५० हजारभन्दा बढी प्रहरी परिचालन गरिएको प्रहरीले जनाएको छ। प्रहरीले व्यापारिक केन्द्र, भण्डारण स्थल तथा चाडपर्वमा बढी भीड हुने क्षेत्रमा निगरानी बढाएको छ। मिसावट तथा गैरकानुनी गतिविधि नियन्त्रणका लागि सम्बन्धित निकायसँगको समन्वयमा संयुक्त बजार अनुगमनसमेत भइरहेको प्रहरीले जनाएको छ। प्रहरी प्रवक्ता काफ्लेले कानुनविपरीतका गतिविधिमा शून्य सहनशीलताको नीति अपनाउँदै प्रहरी परिचालन गरिएको बताए। उनका अनुसार स्थानीय तहले फूल तथा मालाको बिक्री वितरणका लागि तोकेका स्थानमा मूल्यवृद्धिलगायतका विषयमा समेत प्रहरीले विशेष निगरानी गरिरहेको छ। “मिसावट गर्ने कुरामा संयुक्त बजार अनुगमन गरिरहेका छौँ। व्यापारिक केन्द्र तथा भण्डारण स्थलमा निगरानी बढाएका छौँ। कसैले कानुनविपरीत क्रियाकलाप गर्छ भने कारबाही हुन्छ। शून्य सहनशीलतामा नेपाल प्रहरी संगठनले आफ्ना प्रहरी कर्मचारीलाई परिचालन गरेर काम गरिरहेको अवस्था छ,” उनले भने। घर लामो समय खाली नराख्न आग्रह प्रहरीले तिहारका बेला लामो समयका लागि घरबाहिर जाँदा विशेष सावधानी अपनाउन नागरिकलाई आग्रह गरेको छ। घर खाली रहेका बेला चोरी, डकैती तथा लुटपाटको जोखिम बढ्न सक्ने भन्दै यात्रासम्बन्धी विवरण सामाजिक सञ्जालमा सार्वजनिक नगर्न प्रहरीले सुझाव दिएको छ। घरमा बहुमूल्य गरगहना तथा ठूलो रकम नराख्न, सम्भव भएसम्म सीसीटीभी जडान गर्न र सुरक्षित ताल्चाको व्यवस्था गर्न प्रहरीले आग्रह गरेको छ। आगलागी रोकथाममा विशेष सतर्कता लक्ष्मीपूजाका क्रममा दियो, मैनबत्ती तथा अन्य प्रज्वलनशील सामग्री प्रयोग गर्दा विशेष सावधानी अपनाउन प्रहरीले आग्रह गरेको छ। दियो तथा मैनबत्ती पर्दा, कपडा वा अन्य छिट्टै आगो सल्किने सामग्री नजिक नबाल्न र बालेर त्यत्तिकै नछाड्न प्रहरीले अनुरोध गरेको हो। बालबालिकालाई आगो तथा विस्फोटक पदार्थबाट टाढा राख्न तथा गुणस्तरहीन विद्युतीय सामग्री प्रयोग नगर्न पनि प्रहरीले आग्रह गरेको छ। विद्युत्का उपकरण तथा तारको अवस्था जाँच गर्नसमेत प्रहरीले अनुरोध गरेको छ। सम्भावित आगलागी तथा अन्य विपद् व्यवस्थापनका लागि प्रहरीका क्विक रेस्पोन्स टिम (क्यूआरटी), सिआरभी तथा विपद् व्यवस्थापनमा खटिने जनशक्तिलाई तयारी अवस्थामा राखिएको प्रवक्ता काफ्लेले जानकारी दिए। “प्रज्वलनशील पदार्थको प्रयोगबाट आगलागी हुन सक्छ। दियो, मैनबत्ती पर्दा, कपडा वा आगो सल्किने ठाउँमा नबालौँ, त्यत्तिकै नछोडौँ। केटाकेटीलाई त्यस्ता चिज नदिऔँ। विशेष निगरानी गरौँ र गुणस्तरहीन विद्युतीय सामग्री पनि प्रयोग नगरौँ,” उनले भने। प्रहरीले तिहार, छठ तथा नेपाल संवतका अवसरमा शान्तिपूर्ण, सुरक्षित र मर्यादित रूपमा चाडपर्व मनाउन नागरिकलाई आग्रह गरेको छ। कुनै शंकास्पद गतिविधि, दुर्व्यवहार वा आपराधिक क्रियाकलाप देखिएमा तत्काल प्रहरीको १०० नम्बरमा जानकारी गराउन पनि प्रहरीले अनुरोध गरेको छ। – न्युज एजेन्सी नेपाल