टी-२० क्रिकेटमा राशिदको ऐतिहासिक कीर्तिमान

शारजाह । अफगानिस्तानका स्टार लेग स्पिनर राशिद खानले पुरुष टी-२० अन्तर्राष्ट्रिय क्रिकेटमा ऐतिहासिक कीर्तिमान रच्नुभएको छ । उहाँ टी-२० अन्तर्राष्ट्रिय क्रिकेटमा २०० विकेट पूरा गर्ने विश्वकै पहिलो बलर बन्नुभएको हो । २८ वर्षीय राशिदले आफ्नो १२१औँ खेलमा यो दुर्लभ माइलस्टोन हासिल गर्नुभएको हो । शारजाहमा बिहीबार जिम्बाब्वेविरुद्ध खेलिएको दोस्रो टी-२० म्याचमा राशिदले जिम्बाब्वेका विकेटकिपर ब्याट्सम्यान तदिवानाशे मारुमानीलाई एलबिडब्लु आउट गर्दै आफ्नो २००औँ विकेट पूरा गर्नुभयो । ऐतिहासिक खेलमा अफगानिस्तानले जिम्बाब्वेलाई १९ रनले पराजित गर्दै तीन खेलको सिरिजमा २-० को अजेय अग्रता बनाएको छ । सिरिजको तेस्रो तथा अन्तिम खेल आगामी नोभेम्बर १ मा खेलिनेछ । टी-२० अन्तर्राष्ट्रियमा उहाँको औसत मात्र १३.९६ को रहेको छ भने इकोनोमी रेट ६.१३ को मात्र छ, जुन छोटो फर्म्याटमा कुनै पनि बलरका लागि सपनाजस्तै हो । उहाँको यो उत्कृष्ट करियरमा दुईपटक ५ विकेट लिएको कीर्तिमान पनि समावेश छ, जहाँ उहाँको उत्कृष्ट प्रदर्शन ३ रन दिएर ५ विकेट लिनु रहेको थियो । अन्तर्राष्ट्रिय टी-२० मा सर्वाधिक विकेट लिने शीर्ष ५ बलरहरूको सूचीमा राशिदपछि क्रमशः आदिल रसिद (इंग्ल्याण्ड) : १५३ खेल, १७१ विकेट, एहसान खान (हङकङ) : १११ खेल, १६५ विकेट, इश सोढी (न्युजिल्याण्ड) : १४२ खेल, १६५ विकेट र टिम साउदी (न्युजिल्याण्ड) : १२६ खेल, १६४ विकेट रहेका छन् । भारततर्फबाट टी-२० अन्तर्राष्ट्रियमा सर्वाधिक विकेट लिने रेकर्ड बायाँ हाते तीव्र गतिका बलर अर्शदीप सिंहको नाममा छ । अर्शदीपले १०२ खेलमा १४९ विकेट लिनुभएको छ । एजेन्सी