टिकटकको सहयोगमा ‘भिजिट नेपाल’ अभियान

काठमाडौं । सामाजिक सञ्जाल प्लेटफर्म टिकटकले नेपाल पर्यटन बोर्डसँगको सहकार्यमा नेपालको पर्यटन प्रवर्द्धन गर्ने उद्देश्यसहित भिजिट नेपाल अभियान औपचारिकरूपमा सुरु गरेको छ । शुक्रबार राजधानीमा आयोजित कार्यक्रममार्फत् सार्वजनिक गरिएको उक्त अभियानले नेपालको समृद्ध संस्कृति, प्राकृतिक सौन्दर्य तथा विविध पर्यटकीय गन्तव्यलाई डिजिटल माध्यमबाट अन्तर्राष्ट्रिय दर्शकमाझ पुर्‍याउने लक्ष्य राखेको छ । उक्त पहलले नेपाललाई विश्व पर्यटन बजारमा आकर्षक गन्तव्यका रूपमा स्थापित गर्न सहयोग पुग्ने अपेक्षा गरिएको छ । टिकटक र बोर्डबीचको सहकार्यले नेपालको पर्यटन क्षेत्रको डिजिटल प्रवर्द्धन थप प्रभावकारी बनाउनुका साथै स्थानीय सिर्जनाकर्मी, पर्यटन उद्यमी, साना व्यवसाय तथा समुदायका लागि नयाँ अवसर सिर्जना गर्ने लक्ष्य लिएको छ । अभियानअन्तर्गत टिकटकले युरोप, मध्यपूर्व, दक्षिणपूर्वी एसिया र दक्षिण एसियाका नौ जना अन्तर्राष्ट्रिय ट्राभल कन्टेन्ट क्रियटरलाई नेपाल ल्याएको छ । अक्टोबर ३० देखि नोभेम्बर ७ सम्म नेपालमा रहने उनीहरूले विभिन्न पर्यटकीय गन्तव्य भ्रमण गरी आफ्ना अनुभव डिजिटल सामग्रीमार्फत् विश्वभरका दर्शकमाझ प्रस्तुत गरिरहेका छन् । जसबाट नेपालका स्थापित पर्यटकीय गन्तव्यसँगै ओझेलमा परेका सम्भावनायुक्त स्थानहरूको अन्तर्राष्ट्रिय पहिचान विस्तार हुने अपेक्षा गरिएको छ । त्यसैगरी, पर्यटनसम्बन्धी सामग्रीको पहुँच र दर्शक सहभागिता बढाउन टिकटकले छुट्टै भिजिट नेपाल ह्यासट्याग पेज सञ्चालनमा ल्याएको छ । टिकटकको ‘कोल्याब’ फिचरमार्फत् पर्यटन बोर्डले नेपाली सेलिब्रेटी तथा स्थानीय क्रियटरसँग सहकार्य गर्दै नेपालको पर्यटन, संस्कृति र स्थानीय जीवनशैलीलाई प्रामाणिक ढंगले प्रस्तुत गरिरहेको छ । अभियानको अर्को महत्त्वपूर्ण पक्षका रूपमा लोकप्रिय पर्यटकीय गन्तव्यबाट लाइभस्ट्रिमसमेत सञ्चालन गरिएको छ । जसले विश्वभरका दर्शकलाई भर्चुअल रूपमा नेपालका विभिन्न स्थानको अनुभव लिन र भविष्यमा भ्रमणका लागि गन्तव्य छनोट गर्न सहयोग पुर्‍याउनेछ । अभियान सन् २०२६ को अन्त्यसम्म सञ्चालन हुने बताइएको छ । कार्यक्रममा सूचना तथा सञ्चारमन्त्री डा. विक्रम तिमिल्सिनाले डिजिटल प्लेटफर्मले विश्वभर पर्यटकीय गन्तव्यको पहिचान र प्रवर्द्धन गर्ने शैलीमा परिवर्तन ल्याएको बताउनुभएको थियो । टिकटकका मध्यपूर्व, युरेसिया तथा अफ्रिका (एमइए) क्षेत्रका सरकारी सम्बन्ध तथा सार्वजनिक नीति प्रमुख एमिर गेलेनले नेपाल सरकार र नेपाल पर्यटन बोर्डसँगको सहकार्यले नेपालको पर्यटन सम्भावनालाई विश्वव्यापी दर्शकमाझ पुर्‍याउन सहयोग गर्ने बताउनुभएको थियो ।