काठमाडौं। विगत चार वर्षदेखि अलपत्र रहेको लामोसाँघु: तामाकोशी-जिरी सडकअन्तर्गत मुडे-चरिकोट खण्डको स्तरोन्नति कार्य पुनः सुरु भएको छ। सडक डिभिजन चरिकोटले ठेक्का तोड्ने प्रक्रिया अघि बढाएपछि निर्माण कम्पनीले तिहारअघिबाट काम सुरु गरेको हो। पूर्वाधार विकास मन्त्री सुनिल लम्सालले मन्त्रालयले आयोजनाको प्रगतिमाथि नियमित निगरानी राखिरहेको जानकारी दिएका छन्। उनले कामको गति नबढेमा ठेक्का सम्झौता रद्द गरेर भए पनि निर्माण सम्पन्न गरिने स्पष्ट पारेका छन्। मन्त्री लम्सालले भने, ‘हामीले दैनिक रूपमा आयोजनाको प्रगति अनुगमन गरिरहेका छौँ। तोकिएको गतिमा काम अघि नबढे पुनः ठेक्का तोडेर बाँकी काम सक्ने तयारी छ।’ उक्त सडक स्तरोन्नति आयोजना वि.सं. २०७५ सालमा ठेक्का सम्झौता भई सुरु भएको थियो। पटक-पटक म्याद थप गर्दा पनि काम सम्पन्न हुन नसकेपछि २०८० सालमा पुरानो ठेक्का तोडेर नयाँ प्रक्रिया सुरु गर्ने निर्णय भएको थियो। तर, निर्माण कम्पनी अदालत गएपछि परियोजना रुग्ण बनेको थियो। २०८१ सालमा अदालतले पुरानै निर्माण कम्पनीबाट काम गराउन आदेश दिएको थियो। त्यसपछि चार पटक म्याद थप गर्दा पनि कम्पनीले काम अघि बढाएको थिएन। नयाँ सरकार गठन भएपछि कम्पनीलाई काम सम्पन्न गर्न अन्तिम पटक मौका दिइएको थियो। सो अवधिमा पनि कामले गति नलिएपछि मन्त्रालयले ठेक्का तोड्ने प्रक्रिया अघि बढाएको थियो। मन्त्रालयको कडाइपछि निर्माण कम्पनी कार्यक्षेत्रमा फर्किएको मन्त्री लम्सालले बताएका छन्।
चार वर्षदेखि अलपत्र मुडे-चरिकोट सडकको काम सुरु

Read Complete Original Article
Published originally on नेपालन्युज






