काठमाडौँ। अर्थमन्त्री डा. स्वर्णिम वाग्लेले चालु आर्थिक वर्षको चार महिनामा भन्सार राजस्व सङ्कलन उत्साहजनक रहेको बताएका छन्। आन्तरिक राजस्व विभागले आयोजना गरेको ‘राष्ट्रिय कर दिवस २०८३’ कार्यक्रममा उनले सरकारले नीतिगत सुधार र सुशासन कायम गरेकाले राजस्व सङ्कलनमा सकारात्मक नतिजा देखिन थालेको दाबी गरे। “असोजमा पूरै कर राजस्वको लक्ष्य पूरा गरेका छौँ। त्यसैले केही न केही काम भइराखेको छ । सुधारले नतिजा दिन थालेका छन्”, उनले भने, “बम्पर उपहार योजना एउटा सानो अंश र उत्प्रेरणा हो, यसले पनि नतिजा दिएको छ । प्रणालीगत सुधारले पनि अर्थतन्त्रलाई औपचारिक दायरामा ल्याउँदै स्वेच्छिक कर अनुपालन बढाउन नतिजा दिने अपेक्षा गरेको छु।” सरकारले तोकेको लक्ष्यभन्दा बढी भन्सार राजस्व सङ्कलन हुनुलाई सुशासनको लाभांशका रूपमा बुझ्नुपर्ने अर्थमन्त्री वाग्लेले बताए। “सरकारले अर्थतन्त्र सुधारका लागि चालेका कदम र सुशासनको लाभांशका कारण प्रतिकूलताका बीच पनि हामी अगाडि बढिरहेका छौँ र राजस्वका लक्ष्य पूरा गर्दै आएका छौँ”, उनले भने। उनले कर प्रशासनको डिजिटल रूपान्तरण र स्वचालनलाई सुशासनको अभिन्न अङ्गका रूपमा अघि बढाइएको जानकारी दिए। “आन्तरिक राजस्व विभागको एकीकृत कर प्रणालीलाई सरल, सहज, सुरक्षित, व्यवसायमैत्री र करदातामैत्री बनाउन आवश्यक प्राविधिक सुधार भइरहेको छ”, उनले भने, “कारोबार, लेखा प्रतिवेदन तयारी, आय विवरण पेस र कर दाखिलासम्मका प्रक्रियालाई प्रविधिमार्फत सहज र स्वचालित बनाउँदै कर प्रशासनको कार्यदक्षता अभिवृद्धि गर्ने दिशामा काम भइरहेको छ।” सरकारले उद्यम तथा व्यवसायको प्रवर्द्धन, लगानी विस्तार र अर्थतन्त्रलाई चलायमान बनाउन कर नीतिमा सुधार तथा करका दर र दायराको पुनरवलोकन गर्दै आएको पनि उनले बताए। “सरकारले भन्सार महसुल, अन्तःशुल्कदेखि सबै क्षेत्रमा सुधार सुरु गरेको छ”, उनले भने। सोही अवसरमा प्रधानमन्त्री वालेन्द्र शाहका सूचना तथा सञ्चार प्रविधि सल्लाहकार विवेक मिश्रले नयाँ स्वरूपको करदाता पोर्टल शुभारम्भ गरे। कार्यक्रममा आन्तरिक राजस्व विभागको आर्थिक वर्ष २०८२/८३ को वार्षिक प्रतिवेदन र स्मारिका पनि विमोचन गरिएको थियो । विभागका महानिर्देशक भीष्मकुमार भुसालले नीतिगत सुधारका कामलाई उच्च प्राथमिकतामा राख्दै आएको जानकारी दिए।
चार महिनामा राजस्व सङ्कलन उत्साहजनक रहेको अर्थमन्त्रीको दाबी

Read Complete Original Article
Published originally on नेपालन्युज






