ग्लोबल आइएमई बैंकको अत्याधुनिक केन्द्रीय कार्यालय भवन उत्तरढोकामा बन्ने, लागत ३ अर्ब

काठमाडौं । ग्लोबल आइएमई बैंकले काठमाडौंको उत्तरढोकामा अत्याधुनिक केन्द्रीय कार्यालय भवन निर्माण गर्ने भएको छ। बैंकका अध्यक्ष चन्द्रप्रसाद ढकालले धनतेरसको अवसर पारेर शुक्रबार प्रस्तावित भवनको शिलान्यास तथा जग पूजा गरेका छन् । करिब १ लाख ४५ हजार वर्गफिट बिल्टअप क्षेत्रफलमा निर्माण हुने भवन तीन वर्षभित्र सम्पन्न गर्ने बैंकको लक्ष्य छ। भवनको संरचना निर्माणदेखि इन्टेरियरलगायत सम्पूर्ण कामका लागि करिब ३ अर्ब रुपैयाँ खर्च हुने अनुमान गरिएको बैंकले जनाएको छ। शिलान्यास कार्यक्रममा अध्यक्ष ढकालले प्रस्तावित भवन वाणिज्य बैंकहरूमध्ये सबैभन्दा बढी क्षेत्रफल भएको र अत्याधुनिक सुविधासम्पन्न केन्द्रीय कार्यालयमध्ये एक बन्ने विश्वास व्यक्त गरे। काठमाडौंको प्राइम लोकेसन उत्तरढोकामा निर्माण हुन लागेको भवन भविष्यमा आइकनिक संरचनाका रूपमा स्थापित हुने उनको भनाइ छ। ढकालले बैंकका ग्राहक, सेयरधनी, कर्मचारी तथा शुभेच्छुकहरूको साथ र सहयोगकै कारण काठमाडौंको प्राइम क्षेत्रमा केन्द्रीय कार्यालय निर्माण गर्ने अवस्थामा पुगेको बताए। आगामी दिनमा पनि नेपाल सरकार, नेपाल राष्ट्र बैंक, नियमनकारी निकाय, आम नागरिक तथा ग्राहकबाट निरन्तर सहयोग प्राप्त हुने विश्वास उनले व्यक्त गरे । कार्यक्रममा बैंकका प्रमुख कार्यकारी अधिकृत (सीईओ) सुरेन्द्रराज रेग्मीले करिब ५९ लाख ग्राहकको विश्वास, माया र शुभेच्छाका कारण ग्लोबल आइएमई बैंक ठूलो बैंकका रूपमा स्थापित हुन सफल भएको बताए। हाल बैंकका केन्द्रीय कार्यालयअन्तर्गतका विभिन्न विभाग एउटै भवनबाट सञ्चालन हुन नसकिरहेको अवस्थामा नयाँ भवन निर्माणपछि सबै विभागलाई एउटै छानामुनिबाट सञ्चालन गर्न सकिने उनले जानकारी दिए। रेग्मीका अनुसार तीन वर्षभित्र निर्माण सम्पन्न गर्ने लक्ष्य राखिएको भवन नेपालमा सञ्चालनमा रहेका वाणिज्य बैंकका केन्द्रीय कार्यालयमध्ये अत्याधुनिक हुनेछ। नयाँ भवनबाट बैंकका केन्द्रीय स्तरका विभागहरूको कार्यसम्पादन थप व्यवस्थित, प्रभावकारी र सहज हुने बैंकको अपेक्षा छ। बैंकले नयाँ भवन निर्माणलाई संस्थागत पूर्वाधार विकाससँगै सेवा प्रवाहलाई थप प्रभावकारी बनाउने महत्वपूर्ण योजनाका रूपमा लिएको छ। ग्राहकको विश्वास र सहयोगलाई आफ्नो सफलताको आधार मान्दै आगामी दिनमा आधुनिक पूर्वाधार निर्माण तथा गुणस्तरीय बैंकिङ सेवा विस्तारलाई प्राथमिकता दिने बैंकले जनाएको छ।