खुल्यो तातोपानी नाका, दसैँका सामान बोकेका कन्टेनर नेपाल भित्रिन थाले

सिन्धुपाल्चोक । दसैँका सामान तथा अत्यावश्यक सामग्रीको आपूर्ति सहज बनाउन चीनसँगको तातोपानी नाका तीन दिनका लागि अस्थायी रूपमा खुला गरिएको छ । नाका खुलेसँगै चीनको स्वशासित क्षेत्र सिचाङबाट शनिबार बिहानैदेखि मालवाहक सवारीसाधन नेपाल प्रवेश गर्न थालेका छन् । तातोपानी भन्सार कार्यालयका प्रमुख दीपेन्द्रप्रकाश गिरीका अनुसार चाडपर्वका लागि आवश्यक सामग्री तथा अन्य अत्यावश्यक वस्तुको आपूर्ति सहज बनाउने उद्देश्यले चिनियाँ पक्षले तीन दिनका लागि नाका सञ्चालनमा ल्याएको हो । सिन्धुपाल्चोक उद्योग वाणिज्य सङ्घका अध्यक्ष बुद्धराज बस्नेतले नाका खुल्ने प्रतीक्षामा लिपिङ र कोदारी क्षेत्रमा कन्टेनरको लाम लागेको जानकारी दिनुभयो । उहाँका अनुसार चीनको सिचाङस्थित न्यालममा ४५ भन्दा बढी कन्टेनर नेपाल प्रवेशको प्रतीक्षामा छन् । चीनले गत भदौ १५ गतेदेखि अर्को सूचना जारी नभएसम्मका लागि तातोपानी नाका पूर्ण रूपमा बन्द गरेको थियो । नाका बन्द हुँदा चाडपर्वका लागि आवश्यक सामग्री आयात प्रभावित भएको थियो । अस्थायी रूपमा नाका सञ्चालनमा आएपछि दसैँका लागि आवश्यक सामान तथा अन्य उपभोग्य वस्तु नेपाल भित्र्याउन सहज हुने अपेक्षा गरिएको छ ।