नयाँ दिल्ली । भारतले न्युजिल्यान्डविरुद्धको पहिलो एकदिवसीय अन्तर्राष्ट्रिय क्रिकेटमा पाँच विकेटको शानदार जित निकालेको छ । अकल्यान्डमा खेलिएको खेलमा भारतीय स्टार ब्याटर विराट कोहलीले कीर्तिमानमाथि कीर्तिमान बनाउँदै महान् क्रिकेटर सचिन तेन्दुलकरको रेकर्डसमेत तोड्नुभयो । लक्ष्य पछ्याउने क्रममा सर्वाधिक रन बनाउने ब्याटर बन्नुभएका कोहलीले खेलमा व्यक्तिगत उपलब्धिका नयाँ इतिहास पनि रच्नुभयो । कोहलीले एकदिवसीय अन्तर्राष्ट्रिय क्रिकेटमा लक्ष्य पछ्याउने क्रममा अहिलेसम्म आठ हजार ७४१ रन बनाउनुभएको छ । यससँगै उहाँले सचिनको नाममा रहेको आठ हजार ७२० रनको कीर्तिमानलाई पछि पार्नुभयो । लक्ष्य पछ्याउने क्रममा सर्वाधिक रन बनाउने ब्याटरको सूचीमा अब कोहली पहिलो स्थानमा पुग्नुभएको छ । न्युजिल्यान्डविरुद्धको खेलमा कोहलीले अर्को महत्वपूर्ण उपलब्धिसमेत हासिल गर्नुभयो । उहाँले एकदिवसीय अन्तर्राष्ट्रिय क्रिकेटमा न्युजिल्यान्डविरुद्ध आफ्नो रन संख्या १ हजार ९७१ पुर्याउनुभयो । यससँगै उहाँले अस्ट्रेलियाका पूर्वकप्तान रिकी पोन्टिङको कीर्तिमानसँग बराबरी गर्नुभएको छ । त्यस्तै, एकदिवसीय क्रिकेटमा तेस्रो नम्बरमा ब्याटिङ गर्दै १३ हजार रन पूरा गर्ने विश्वकै पहिलो खेलाडी बन्ने ऐतिहासिक उपलब्धि पनि कोहलीले आफ्नो नाममा लेखाउनुभएको छ । उक्त कीर्तिमान बनाउन उहाँलाई १२ रन आवश्यक थियो । खेलको सातौँ ओभरको दोस्रो बलमा आफ्नो १२औँ रन पूरा गरेसँगै उहाँले यो उपलब्धि हासिल गर्नुभयो । यसअघि तेस्रो नम्बरमा ब्याटिङ गर्दै सर्वाधिक रन बनाउने खेलाडीको सूचीमा पोन्टिङ दोस्रो स्थानमा हुनुहुन्थ्यो । भारतका कप्तान तथा अनुभवी ब्याटर रोहित शर्मा भने शून्य रनमै आउट हुनुभयो । उहाँ एकदिवसीय अन्तर्राष्ट्रिय क्रिकेटमा आफ्नो करियरको १७औँ पटक शून्यमा आउट हुनुभएको हो । यससँगै उहाँले पूर्वभारतीय कप्तान सौरभ गांगुलीलाई पछि पार्नुभएको छ । गांगुली आफ्नो एकदिवसीय करियरमा १६ पटक शून्य रनमा आउट हुनुभएको थियो । रोहितले यो कीर्तिमान पार गरेसँगै एकदिवसीय क्रिकेटमा शून्यमा आउट हुने भारतीय ब्याटरको सूचीमा नयाँ तथ्यांक थपिएको हो । खेलमा भारतले उत्कृष्ट प्रदर्शन गर्दा न्युजिल्यान्डको ब्याटिङ भने कमजोर रह्यो । घरेलु मैदानमा भारतविरुद्ध खेलिरहेको न्युजिल्यान्डको टोली १८५ रनमै अलआउट भएको थियो । भारतविरुद्ध आफ्नै घरेलु मैदानमा बनाएको यो न्युजिल्यान्डको चौथो सबैभन्दा कम एकदिवसीय योगफल हो । एजेन्सी
कोहलीले तोडे सचिनको कीर्तिमान
Read Complete Original Article
Published originally on हिमालय टाइम्स
