<p> <p style="text-align:justify">काठमाडौं । कुमारी बैंक लिमिटेडको क्रेडिट रेटिङमा सुधार भएको छ । इक्रा नेपालले बैंकको इश्युअर रेटिङ ‘इक्राएनपी–आईआर बीबी प्लस’बाट बढाएर ‘इक्राएनपी–आईआर बीबीबी माइनस’ कायम गरेको छ । त्यस्तै, बैंकको ६ अर्ब रुपैयाँ बराबरको सबोर्डिनेट डिबेन्चरको रेटिङ पनि ‘एलबीबी प्लस’बाट बढाएर ‘एलबीबीबी माइनस’ कायम गरिएको छ ।</p></p> <p> <p style="text-align:justify">बैंकको पुँजीकरण अवस्थामा सुधार, नाफा वृद्धि र सहज तरलता अवस्थालाई आधार बनाएर रेटिङ बढाइएको इक्रा नेपालले जनाएको छ । पछिल्लो दुई वर्षमा बैंकको पुँजी पर्याप्तता सूचकमा सुधार आएको छ भने आर्थिक वर्ष २०८२-८३ मा नाफासमेत उल्लेख्य बढेको छ ।यद्दपि, बैंकको खराब कर्जा बढ्दै जानु, कर्जा असुलीमा दबाब रहनु र ठूला ऋणीमा कर्जा केन्द्रित हुनु चुनौतीका रूपमा रहेको इक्राको विश्लेषण छ ।</p></p> <p> <p style="text-align:justify"><strong>दुई वर्षमा टियर–१ क्यापिटल ७.७० बाट ९.८७ प्रतिशत</strong></p></p> <p> <p style="text-align:justify">कुमारी बैंकको रेटिङ बढ्नुको प्रमुख आधार पुँजीकरण अवस्थामा आएको सुधार हो । बैंकको टियर–१ क्यापिटल अनुपात २०८०-८१ मा ७.७० प्रतिशत रहेकोमा गत वर्षसम्म ९.८७ प्रतिशत पुगेको छ । यसको सीआरएआर पनि बढेको छ । सन् २०२५ जुलाई मध्यमा १२.९८ प्रतिशत रहेको यस्तो अनुपात सन् २०२६ जुलाई मध्यमा १३.५० प्रतिशत पुगेको छ । त्यस्तै, टियर–१ क्यापिटल अनुपात अघिल्लो रेटिङ अवधिको ८.९४ प्रतिशतबाट बढेर ९.८७ प्रतिशत पुगेको छ ।</p> <p style="text-align:justify">टियर–१ क्यापिटल भनेको बैंकको सबैभन्दा बलियो र प्राथमिक पुँजी हो । बैंकले कर्जा नोक्सानी वा अन्य वित्तीय जोखिम व्यहोर्नुपर्दा यही पुँजीले पहिलो सुरक्षा प्रदान गर्छ । त्यसैले यसको अनुपात बढ्नु बैंकको वित्तीय जोखिम सहन सक्ने क्षमता बलियो हुँदै गएको संकेत हो । इक्राका अनुसार बैंकको टियर–१ क्यापिटल अनुपात नियामकीय न्यूनतम ८.५ प्रतिशतभन्दा माथि पुगेको छ । सन् २०२५ जुलाईदेखि नै बैंकले यो अनुपात नियामकीय सीमाभन्दा माथि कायम राख्दै आएको छ ।</p> <p style="text-align:justify"><strong>गत वर्षको नाफा ७ अर्ब ३० करोड, प्रोभिजन फिर्ताले पनि दियो साथ</strong></p></p> <p> <p style="text-align:justify">बैंकको नाफामा भएको सुधार पनि रेटिङ बढाउने अर्को आधार बनेको छ । कुमारी बैंकले गत आर्थिक वर्षमा ७ अर्ब ३० करोड रुपैयाँ खुद नाफा कमाएको इक्राको प्रतिवेदनमा उल्लेख छ ।चालु आर्थिक वर्षको पहिलो त्रैमासमा भने बैंकले १ अर्ब ७ करोड रुपैयाँ नाफा कमाएको छ ।</p> <p style="text-align:justify">गत वर्षबैंकको सम्पत्तिमा प्रतिफल (आरओए) ०.५० प्रतिशतबाट बढेर १.५८ प्रतिशत पुगेको छ । तर, नाफामा भएको यो सुधारको पछाडि कर्जा नोक्सानी व्यवस्थाका लागि छुट्याइएको प्रोभिजनमध्ये केही रकम फिर्ता हुनु पनि प्रमुख कारण रहेको इक्राले जनाएको छ ।</p> <p style="text-align:justify">बैंकले विगतमा केही ठूला कर्जामा नियामकीय आवश्यकताभन्दा बढी प्रोभिजन छुट्याएको थियो । तीमध्ये केही कर्जा खराब कर्जामा वर्गीकरण नभएपछि छुट्याइएको अतिरिक्त प्रोभिजन फिर्ता गरिएको हो । यसले गत आर्थिक वर्षको नाफा बढाउन सहयोग गरेको छ ।प्रोभिजन भनेको बैंकले कर्जा नउठ्ने सम्भावनालाई ध्यानमा राखेर छुट्याउने रकम हो । कर्जाको जोखिम घटेमा वा पहिले छुट्याइएको रकम आवश्यक नपर्ने अवस्थामा त्यसको केही हिस्सा फिर्ता गर्न सकिन्छ । यस्तो रकम फिर्ता हुँदा बैंकको नाफामा सकारात्मक प्रभाव पर्छ ।</p> <p style="text-align:justify">तर, बैंकको खुद ब्याज मार्जिन (एनआईएम) भने घटेको छ । अघिल्लो वर्ष २.७३ प्रतिशत रहेको एनआईएम गत आर्थिक वर्षमा २.५७ प्रतिशतमा झरेको छ ।</p> <p style="text-align:justify">यसले बैंकले कर्जा लगानीबाट कमाउने ब्याज र निक्षेपलगायत कोषमा तिर्ने ब्याजबीचको अन्तर साँघुरिँदै गएको देखाउँछ । त्यसैले आगामी दिनमा प्रोभिजन फिर्ताबाट नभई नियमित बैंकिङ व्यवसायबाटै नाफा कायम राख्न सक्ने क्षमता महत्त्वपूर्ण हुने इक्राको निष्कर्ष छ ।</p> <p style="text-align:justify"><strong>खराब कर्जा ६.४२ बाट बढेर ८.८३ प्रतिशत</strong></p> <p style="text-align:justify">रेटिङ बढे पनि बैंकको सबैभन्दा ठूलो चुनौती सम्पत्तिको गुणस्तरमा देखिएको छ । बैंकको कुल खराब कर्जा (ग्रस एनपीए) अघिल्लो वर्ष ६.४२ प्रतिशत रहेकोमा गत वर्ष बढेर ८.८३ प्रतिशत पुगेको छ । चालु आर्थिक वर्षको पहिलो त्रैमासमाभनेएनपीएल ९.१५ प्रतिशत छ । जुन गत वर्षको भन्दा बढी हो ।</p> <p style="text-align:justify">कर्जाको किस्ता वा ब्याज भुक्तानी गर्नुपर्ने मिति नाघेको अवस्थालाई पनि इक्राले जोखिमको सूचकका रूपमा लिएको छ । बैंकको शून्य दिनभन्दा बढी भुक्तानी अवधि नाघेका कर्जा (०+ डीपीडी) को अनुपात अघिल्लो वर्षको करिब १९ प्रतिशतबाट बढेर गत वर्षमा करिब २२ प्रतिशत पुगेको छ ।</p> <p style="text-align:justify"><strong>२० ठूला ऋणीमा कुल कर्जाको २५ प्रतिशत लगानी</strong></p> <p style="text-align:justify">कुमारी बैंकको अर्को चुनौती कर्जा लगानी केही ठूला ऋणी समूहमा केन्द्रित हुनु हो । बैंकको कुल कर्जा पोर्टफोलियोमध्ये शीर्ष २० ऋणी समूहमा मात्रै करिब २५ प्रतिशत कर्जा लगानी रहेको छ ।यो रकम बैंकको टियर–१ पुँजीको करिब २०४ प्रतिशत बराबर हो । अघिल्लो रेटिङ अवधिमा शीर्ष २० ऋणी समूहमा कुल कर्जाको करिब २२ प्रतिशत र टियर–१ पुँजीको १९४ प्रतिशत बराबर लगानी थियो ।</p> <p style="text-align:justify">यसले बैंकको कर्जा लगानीमा ठूला ऋणीको प्रभाव बढ्दै गएको देखाउँछ । ठूला ऋणीमध्ये केहीले मात्रै कर्जा भुक्तानी गर्न नसके पनि बैंकको खराब कर्जा र पुँजीमा ठूलो असर पर्न सक्छ ।यद्दपि, बैंकको खुद्रा तथा साना तथा मझौला उद्यम (एसएमई) क्षेत्रमा रहेको कर्जा लगानीले केही हदसम्म जोखिम विविधीकरण गरेको छ । बैंकको कुल कर्जा लगानीमध्ये यस्तो कर्जाको हिस्सा करिब ४१ प्रतिशत रहेको छ ।</p> <p style="text-align:justify">निक्षेपतर्फ पनि शीर्ष २० निक्षेपकर्ताको हिस्सा कुल निक्षेपको करिब २४ प्रतिशत रहेको छ । अघिल्लो वर्ष यस्तो हिस्सा २६ प्रतिशत थियो ।तरलता अनुपात ४० प्रतिशत, कर्जा–निक्षेप अनुपात ७७ प्रतिशत कुमारी बैंकको तरलता अवस्था भने सहज रहेको इक्राले जनाएको छ । गत वर्ष बैंकको खुद तरल सम्पत्ति र कुल निक्षेपको अनुपात करिब ४० प्रतिशत रहेको छ ।</p> <p style="text-align:justify">त्यस्तै, बैंकको कर्जा–निक्षेप अनुपात (सीडी रेसियो) करिब ७७ प्रतिशत छ । नियामकीय व्यवस्थाअनुसार यसको न्यूनतम सीमा २० प्रतिशत र अधिकतम सीमा ९० प्रतिशत रहेको छ । खुद तरल सम्पत्ति भन्नाले बैंकले तत्काल आवश्यक पर्दा प्रयोग गर्न सक्ने नगद तथा नगदमा रूपान्तरण गर्न सहज हुने सम्पत्तिलाई बुझिन्छ । यसको अनुपात राम्रो हुनु बैंकको निक्षेप फिर्ता गर्न सक्ने क्षमता सहज रहेको संकेत हो ।</p> <p style="text-align:justify"><strong>सन् २००१ देखि सञ्चालनमा, एनसीसीसँग मर्जरपछि विस्तार</strong></p> <p style="text-align:justify">सन् २००१ मा स्थापना भएको कुमारी बैंकले विभिन्न वित्तीय संस्थालाई गाभ्दै आफ्नो व्यवसाय विस्तार गरेको छ । पछिल्लो पटक सन् २०२३ जनवरीमा नेपाल क्रेडिट एन्ड कमर्स (एनसीसी) बैंकसँग मर्जर गरेको थियो ।मर्जर तथा प्राप्तिपछि बैंकको शाखा सञ्जाल र बजार पहुँच विस्तार भएको छ । बैंकको अनुभवी सञ्चालक समिति र व्यवस्थापन टोलीलाई पनि इक्राले सकारात्मक पक्षका रूपमा लिएको छ ।गत आर्थिक वर्षमा बैंकको कुल सम्पत्ति ४ खर्ब ९१ अर्ब ६८ करोड १० लाख रुपैयाँ पुगेको छ ।<br /> <br /> </p></p>
कुमारी बैंकको रेटिङ बढ्यो, खराब कर्जा नियन्त्रण मुख्य चुनौती
Read Complete Original Article
Published originally on आर्थिक न्यूज
_cwcpettolk_20gq48FP4U.jpg)
