काठमाडौं महानगरद्वारा ३३६ माला र १४० पुष्पगुच्छा जफत

काठमाडौं। तिहारलाई लक्षित गरी काठमाडौं महानगरपालिकाले प्लास्टिकजन्य फूल, माला र पुष्पगुच्छाको बिक्रीमा रोक लगाएको छ। महानगर प्रहरी बलले प्रतिबन्धको अवज्ञा गर्दै बिक्रीका लागि राखिएका ३३६ वटा प्लास्टिकका माला र १४० वटा पुष्पगुच्छा जफत गरेको छ। महानगर प्रहरी बल र वातावरण व्यवस्थापन विभागले सार्वजनिक सूचना जारी गर्दै प्लास्टिकजन्य सामग्रीको बिक्री वितरण निषेध गरेका थिए। महानगरका अनुसार चावहिल, मैजुबहाल, मच्छिन्द्रबहाल, कोटेश्वर, जयबागेश्वरी, कालीमाटी, नयाँ बसपार्क र धुम्बाराहीलगायतका स्थानबाट ती सामग्री जफत गरिएको हो। सबैभन्दा धेरै प्लास्टिकका फूल र माला कोटेश्वर क्षेत्रबाट बरामद भएको छ। महानगरले स्वदेशी फूलको प्रवर्द्धन गर्न ३३ वटा बिक्री केन्द्र तोकेको छ। महानगर प्रहरी बलका प्रमुख विष्णुप्रसाद जोशीका अनुसार किसानले सहज रूपमा फूल बिक्री गर्न सक्ने व्यवस्था मिलाइएको छ। किसानले थप जानकारीका लागि ०१-५९०१७६३, ०१-५९०१७६४ र ९८५१३५६५०९ मा सम्पर्क गर्न सक्नेछन्। वातावरण संरक्षण ऐन, २०७६ अनुसार नेपालभर प्लास्टिकजन्य माला तथा पुष्पगुच्छाको उत्पादन, आयात, बिक्री र भण्डारणमा रोक लगाइएको छ। महानगरले प्रतिबन्धित सामग्री प्रयोग गरेको पाइएमा वातावरण तथा प्राकृतिक स्रोत संरक्षण ऐन, २०७७ र प्रचलित आर्थिक ऐनबमोजिम कारबाही हुने चेतावनी दिएको छ।