कलिलो उमेरमै निलमको मृत्यु, आत्महत्या दुरुत्साहनको आरोपमा समातिए श्रीमान्

कैलाली । कैलालीको गोदावरी नगरपालिका–५ की १९ वर्षीया निलम विष्टको विषादी सेवनपछि मृत्यु भएको घटनामा प्रहरीले उनका श्रीमान् आयुष कटुवाललाई पक्राउ गरेको छ। सामाजिक सञ्जाल फेसबुकमार्फत चिनजान भएपछि प्रेम सम्बन्धमा जोडिएका निलम र आयुषले विवाह गरेका थिए। तर विवाहपछि उनीहरूबीच सम्बन्धमा खटपट सुरु भएको थियो। प्रहरीका अनुसार, आयुषका एक साथीले निलम उनकी पूर्वप्रेमिका भएको भन्दै जिस्क्याएपछि दम्पतीबीच विवाद सुरु भएको थियो। यही विषयलाई लिएर उनीहरूबीचको मनमुटाव बढ्दै गएको बताइएको छ। श्रीमान्बाट निरन्तर तनाव पाएको भन्दै गत सोमबार घरमा कोही नभएका बेला निलमले विषादी सेवन गरेको प्रहरीको भनाइ छ। विषादी सेवनपछि उनलाई उपचारका लागि सुरुमा अत्तरियास्थित पदमा अस्पताल लगिएको थियो। त्यहाँबाट थप उपचारका लागि धनगढीस्थित सिपी अस्पताल रेफर गरिए पनि उनको ज्यान जोगिन सकेन। निलमको मृत्यु भएपछि प्रहरीले घटनाबारे अनुसन्धान अघि बढाएको हो। इलाका प्रहरी कार्यालय मालाखेतीका अनुसार आत्महत्या दुरुत्साहन गरेको आरोपमा आयुषलाई पक्राउ गरिएको छ। उनीमाथि आत्महत्या दुरुत्साहनसम्बन्धी मुद्दामा अनुसन्धान भइरहेको प्रहरीले जनाएको छ।