कम्पनीले पुस मसान्तसम्म विवरण बुझाए पुरानो कर, ब्याज र जरिबाना मिनाहा हुने

काठमाडौं । कम्पनी ऐन, २०६३ बमोजिम दर्ता भएका कम्पनीले कर, शुल्क, दस्तुर, ब्याज तथा जरिबाना मिनाहाको सुविधा पाउने म्याद २०८३ पुस मसान्तसम्म थप गरिएको छ । यसअघि २०८३ असोज मसान्तसम्म कायम रहेको म्याद २०८३ कात्तिक ९ गतेको निर्णयअनुसार बढाएर पुस मसान्तसम्म पुर्‍याइएको हो । सम्बन्धित कानूनले तोकेको म्यादभित्र विवरण पेश नगरेका, नवीकरण नगरेका वा दाखिल गर्नुपर्ने कर, शुल्क, दस्तुर, ब्याज तथा जरिबाना दाखिल नगरेका कम्पनीले यो सुविधा पाउनेछन् । त्यस्ता कम्पनीले कारोबार जारी राख्न वा कम्पनीको दर्ता खारेज गर्न चाहेमा आर्थिक वर्ष २०८२/८३ का लागि कानूनबमोजिम लाग्ने कर, शुल्क, दस्तुर तथा विवरण २०८३ पुस मसान्तभित्र पेश गर्नुपर्नेछ । तोकिएको म्यादभित्र आवश्यक विवरण तथा कर, शुल्क र दस्तुर दाखिल गरेमा सोभन्दा अघिको अवधिमा लागेको वा लाग्ने सम्पूर्ण कर, शुल्क, दस्तुर, ब्याज तथा जरिबाना मिनाहा हुने व्यवस्था गरिएको छ । यस व्यवस्थाले लामो समयदेखि विवरण पेश नगरेका, नवीकरण नगरेका तथा आर्थिक दायित्व पूरा गर्न नसकेका कम्पनीलाई कानूनी प्रक्रिया पूरा गरी कारोबार निरन्तरता दिन वा दर्ता खारेज गर्न सहज हुने अपेक्षा गरिएको छ । The post कम्पनीले पुस मसान्तसम्म विवरण बुझाए पुरानो कर, ब्याज र जरिबाना मिनाहा हुने appeared first on Corporate Khabar : Nepals First Corporate News Magazine and Portal.