एलिस हुआङले एक वर्षअघि नै कम्पनी छाडेको मेगास्पिडको दाबी

काठमाडौं– एनभिडियाका चिप चीन पठाएको आरोपमा अनुसन्धान भइरहेको सिङ्गापुरस्थित डाटा सेन्टर कम्पनी मेगास्पिड इन्टरनेशनलले संदिग्ध जासुसका रूपमा चिनिएकी एलिस हुआङले एक वर्षभन्दा बढी समयअघि नै कम्पनी छाडेको जनाएको छ । मेगास्पिडले दक्षिणपूर्वी एसियामा रहेका आफ्ना डाटा सेन्टरका लागि एनभिडियाका चिप खरिद गरी चीन पठाएर चिनियाँ कम्पनीहरूलाई अमेरिकी निर्यात नियन्त्रण छल्न सघाएको आशङ्का गरिएको छ । कम्पनीकी पूर्वनिर्देशक एलिस हुआङलाई अमेरिकी सञ्चारमाध्यमले कथित चिनियाँ गुप्तचर सम्पत्तिका रूपमा पहिचान गरेका छन् । उनको एनभिडियाका सहसंस्थापक जेन्सेन हुआङसँग सम्बन्ध रहेको दाबीसमेत सार्वजनिक भएको छ । ‘सुश्री एलिस हुआङले सन् २०२५ अगस्ट ३० देखि मेगास्पिड छाडिसक्नुभएको र हाल कम्पनीमा उहाँको कुनै भूमिका छैन’, एएफपीको प्रश्नको जवाफमा कम्पनीले आइतबार भनेको छ । कम्पनीले एलिस हुआङका व्यक्तिगत तथा निजी मामिलाबारे टिप्पणी नगर्ने पनि जनाएको छ । एलिस हुआङ र जेन्सेन हुआङबीच कुनै पारिवारिक सम्बन्ध छैन । बेइजिङले जासुसीसम्बन्धी आरोप अस्वीकार गर्दै आएको छ । जेन्सेन हुआङले नोभेम्बर ८ मा एनभिडियाका कर्मचारीलाई पठाएको पत्रमा विवाहेतर सम्बन्ध स्वीकार गरेका थिए । यद्यपि उनले उक्त सम्बन्धमा संलग्न महिलाको नाम खुलाएका थिएनन् । त्यसको केही दिनपछि हुआङले कम्पनीको प्रमुख कार्यकारी अधिकृत पदबाट राजीनामा दिएका थिए । एनभिडियाको सञ्चालक समितिले यस विषयमा अनुसन्धान गर्ने जनाएको छ । अमेरिकी काङ्ग्रेसका तीन समितिका अध्यक्षले पनि जेन्सेन हुआङलाई नोभेम्बर १८ मा हुने बन्द बैठकमा उपस्थित भई जानकारी दिन आग्रह गरेका छन् । मेगास्पिडले आफूले कानुनसम्मत व्यवसाय सञ्चालन गरिरहेको जनाएको छ । कम्पनीले आफ्नो व्यवसाय, आपूर्ति शृङ्खला र विश्वव्यापी सञ्चालनबारे सञ्चारमाध्यममा आएका दाबीहरू प्रमाणित तथ्यमा आधारित नभएको बताएको छ । कम्पनीले अमेरिकी निर्यात नियन्त्रणसम्बन्धी कानुनअन्तर्गतका आफ्ना दायित्व पालना भए-नभएकोबारे विस्तृत आन्तरिक अनुसन्धान गर्न बाह्य कानुनी परामर्शदाता नियुक्त गरेको पनि जनाएको छ । अमेरिकी कानुनले केही उन्नत चिप चीनमा पठाउन प्रतिबन्ध लगाएको छ । सिङ्गापुरका अधिकारीहरूका अनुसार उन्नत कृत्रिम बुद्धिमता (एआई) चिप जडित सर्भर मलेसियामा निर्यात गरिएको र सिङ्गापुरमा गरिएको घोषणाभन्दा फरक गन्तव्यमा पठाइएको आशङ्का छ । मेगास्पिडमाथिको अनुसन्धान जारी रहेको सिङ्गापुर प्रहरी बलले जनाएको छ । अधिकारीहरूले अनुसन्धानका क्रममा गलत जानकारी दिएको आरोपमा एलिस हुआङलाई गत फेब्रुअरीमा सिङ्गापुर पुनः प्रवेश गर्न रोक लगाइएको पनि बताएका छन् । यद्यपि उनीमाथि जासुसी गरेको आरोपमा अनुसन्धान भने गरिएको थिएन ।