एरिक्सनले पोल्यान्डमा प्रदर्शन गर्‍यो मोबाइल नेटवर्कबाट ड्रोन पत्ता लगाउने प्रविधि

एरिक्सनले प्ले र असेकोसँग मिलेर मोबाइल नेटवर्कको प्रयोगबाट अनुमति नलिएका ड्रोन पत्ता लगाउन सकिने प्रविधि पोल्यान्डका सरकारी अधिकारीहरूसमक्ष प्रदर्शन गरेको छ। क्राकोस्थित इरिक्सनको अनुसन्धान तथा विकास केन्द्रमा आयोजित कार्यक्रममा कम्पनीहरूले विमानस्थल, बन्दरगाह र सीमाजस्ता संवेदनशील स्थानको सुरक्षा गर्न ड्रोन पत्ता लगाउने बहुस्तरीय प्रणाली प्रदर्शन गरेका थिए। यसका लागि इरिक्सनको एकीकृत सेन्सिङ तथा सञ्चार (आईएसएसी) प्रविधि प्रयोग गरिएको थियो। तथ्याङ्क आदानप्रदान गर्न प्लेको मोबाइल नेटवर्क प्रयोग गरिएको थियो। टेलिकम्स डटकमका अनुसार यस प्रदर्शनमा असेकोको ध्वनि पहिचान प्रविधि पनि प्रयोग गरिएको थियो। यस प्रविधिबाट प्राप्त विवरण असेकोको ‘पुस्चिक’ नामक ड्रोन पहिचान प्रणालीमा देखाइएको थियो। पोल्यान्डमा कम उचाइमा उड्ने ड्रोनको ठ्याक्कै स्थान पत्ता लगाउन सक्ने बहुस्तरीय पहिचान प्रणाली विकास गर्ने लक्ष्य रहेको बताइएको छ। असेकोको पुस्चिक ड्रोन पहिचान प्रणालीले पहिले नै जडान गरिएका प्रकाश संरचनामा सेन्सर राखेर काम गर्न सक्छ। यसको इन्टरनेट अफ थिङ्स (आईओटी) प्लेटफर्मले कृत्रिम बुद्धिमताको प्रयोगबाट ड्रोनको आवाज र अन्य तथ्याङ्क विश्लेषण गर्न सक्छ। प्रेस विज्ञप्तिअनुसार, आईएसएसी प्रविधिले प्रसारण गरिएका रेडियो सङ्केत फर्किएपछि प्राप्त हुने परावर्तनको विश्लेषण गरेर वरपरको वातावरणका विशेषता बुझ्न सक्छ। यसबाट ड्रोनजस्ता उड्ने वस्तुको स्थान र गति अनुमान गर्न सकिन्छ। यो प्रविधिलाई छैटौँ पुस्ताको मोबाइल नेटवर्क (६जी) का सम्भावित प्रमुख प्रयोगमध्ये एकका रूपमा हेरिएको छ। यो प्रविधि पोल्यान्ड सरकारका प्रतिनिधि, डिजिटलाइजेसन, नयाँ प्रविधि तथा नवप्रवर्तनसम्बन्धी संसदीय समितिका सदस्य, पोल्यान्डको रक्षा क्षेत्रका प्रतिनिधि, सैन्य प्रविधि विश्वविद्यालय (डब्ल्यूएटी), सैन्य अनुसन्धान संस्थान, स्विडेनको दूतावास, पोल्यान्डको दूरसञ्चार नियामक यूकेई, बिजनेस स्विडेन, पोल्यान्डको सबैभन्दा ठूलो ग्यास तथा तेल कम्पनी ओर्लेन, पोल्यान्डको हवाई नेभिगेसन सेवा एजेन्सी र इरिक्सनका ग्राहकहरूसमक्ष प्रदर्शन गरिएको थियो। एरिक्सन पोल्यान्डका प्रमुख मार्टिन मेलरले भने, “असेकोसँगको सहकार्यमा र तथ्याङ्क आदानप्रदानका लागि प्लेको मोबाइल नेटवर्क प्रयोग गरेर हामी ड्रोन पत्ता लगाउन र तिनको गतिविधि निगरानी गर्न उन्नत परिस्थिति पहिचान प्लेटफर्म बनाउन सक्छौँ।” उनले थपे, “पोल्यान्डको महत्त्वपूर्ण पूर्वाधारको सुरक्षा गर्न यो प्रविधि वास्तविक अवस्थामा कसरी प्रयोग गर्न सकिन्छ भन्ने देखाउन सहकार्य गर्न पाउँदा हामी गर्व गर्छौँ।” प्लेका सञ्चालक समिति सदस्य तथा प्रमुख प्रविधि अधिकारी मिखाउ जिउकोव्स्कीले भने, “आजको आधुनिक दूरसञ्चार नेटवर्क सञ्चारको माध्यम मात्र होइन। यो आर्थिक विकास, डिजिटल रूपान्तरण र विशेषगरी राज्य तथा नागरिकको सुरक्षाको आधारका रूपमा काम गर्ने रणनीतिक र महत्त्वपूर्ण पूर्वाधार हो।” उनले थपे, “यसको व्यापक पहुँच, उपलब्धता र विश्वसनीयताका कारण प्लेको नेटवर्कले विद्यमान पूर्वाधार र स्रोतको प्रयोग गरेर उन्नत निगरानी तथा हवाई क्षेत्रको सुरक्षा प्रणाली विकास गर्न सहयोग गर्न सक्छ।” असेको पोल्यान्डका उपाध्यक्ष ग्रजेगोज बार्टलरले भने, “हाम्रो पुस्चिक प्लेटफर्ममा विभिन्न प्रविधि र पहिचान विधिलाई एकीकृत गरेर हामी हवाई क्षेत्रमा के भइरहेको छ भन्ने बुझ्न आवश्यक धेरै प्रकारका तथ्याङ्क सङ्कलन गर्न सक्छौँ। संवेदनशील क्षेत्र र महत्त्वपूर्ण पूर्वाधारको सुरक्षा गर्न यो महत्त्वपूर्ण छ।” The post एरिक्सनले पोल्यान्डमा प्रदर्शन गर्‍यो मोबाइल नेटवर्कबाट ड्रोन पत्ता लगाउने प्रविधि appeared first on Technology Khabar.