एप्पलका प्रमुख कार्यकारी अधिकृत (सीईओ) जोन टर्नसले वायर्डका स्टिभन लेभीसँग हालै भएको अन्तर्वार्तामा कृत्रिम बुद्धिमत्ता (एआई) को क्षेत्रमा कम्पनीको वर्तमान अवस्थाको बचाउ गरेका छन्। पछिल्ला दुई वर्षमा एप्पल एआईको विकासमा अन्य कम्पनीभन्दा पछाडि रहेको भन्दै आलोचना हुँदै आएको छ। विशेषगरी, कम्पनीले अझ सक्षम सिरि सार्वजनिक गर्न ढिलाइ गरेको थियो। अन्ततः यसै गर्मीयाममा एप्पलले सिरिको नयाँ संस्करण सार्वजनिक गरेको थियो। रोयटर्सका अनुसार सेप्टेम्बरको सुरुवातमा औपचारिक रूपमा सीईओ बनेका टर्नसले यस विषयमा सबैको आआफ्नै धारणा रहेको स्वीकार गरे। तर उनले भने, “हामी अहिले जुन अवस्थामा छौँ, त्यसप्रति म साँच्चै सन्तुष्ट छु।” टर्नसले एप्पलले आफ्ना नयाँ उत्पादनमा एआईको प्रयोग गर्ने स्पष्ट पार्दै भने, “हामी एआईकै लागि एआई उत्पादन सार्वजनिक गर्न चाहँदैनौँ। हामीले सही तरिकाले काम गर्दा मानिसहरूले कुनै काम एआईले गरेको हो वा परम्परागत सफ्टवेयरले गरेको हो भन्ने सोच्नुपर्ने छैन। महत्त्वपूर्ण कुरा भनेको हामीले मानिसहरूले साँच्चै मन पराउने उत्पादन बनायौँ कि बनाएनौँ भन्ने हो।” अन्तर्वार्ताका क्रममा लेभीले एआईले एप्पल र यसको इकोसिस्टममा अझ ठूलो परिवर्तन ल्याउन सक्ने सम्भावनाबारे पनि प्रश्न गरेका थिए। विशेषगरी, एआई एजेन्टका कारण एपहरू नै अनावश्यक हुन सक्ने अवस्थाबारे सोध्दा टर्नसले जवाफ दिए, “त्यसले जीवन निकै सहज बनाउन सक्छ भन्ने मलाई लाग्छ। तर उत्पादन सिर्जना गर्नु गहिरो मानवीय र व्यक्तिगत काम हो, जुन हामीलाई गर्न मन पर्छ।” The post एप्पलका सीईओ भन्छन्– ‘एआईकै लागि एआई उत्पादन सार्वजनिक गर्न चाहँदैनौँ’ appeared first on Technology Khabar.
एप्पलका सीईओ भन्छन्– ‘एआईकै लागि एआई उत्पादन सार्वजनिक गर्न चाहँदैनौँ’
Read Complete Original Article
Published originally on टेक्नोलोजी खबर
