एन्फा अध्यक्ष नेम्बाङसहित चार जनालाई तीन दिनभित्र स्पष्टीकरण दिन निर्देशन

ललितपुर । अखिल नेपाल फुटबल संघ (एन्फा) को बहुमत कार्यसमितिको बैठकले अध्यक्ष पंकजविक्रम नेम्बाङ र महासचिव किरण राईसहित चार जनालाई तीन दिनभित्र स्पष्टीकरण पेश गर्न निर्देशन दिएको छ । ललितपुरस्थित एन्फा मुख्यालयमा वरिष्ठ उपाध्यक्ष वीरबहादुर खड्काको नेतृत्वमा बसेको बैठकले खेल मिलेमतो तथा ठगीसम्बन्धी कसुरमा मुद्दा परेका अध्यक्ष नेम्बाङ, महासचिव राई, कोषाध्यक्ष रविन्द्र जोशी र लेखापाल सञ्जीव पाण्डेलाई स्पष्टीकरण सोध्ने निर्णय गरेको हो । बैठकले पछिल्लो समय एन्फासँग सम्बन्धित विभिन्न विषय सार्वजनिक भएपछि त्यसबारे सम्बन्धित पदाधिकारीबाटै आधिकारिक जानकारी लिन पत्राचार गर्ने निर्णय गरेको सहायक महासचिव बद्री भट्टराईले जानकारी दिनुभयो । उनीहरूलाई घटनाको वास्तविकता, प्रहरी अनुसन्धान र पक्राउ पर्नुको कारणसहित आफ्नो धारणा स्पष्ट पार्न तीन दिनको समय दिइएको छ । ‘खास यो घटना कसरी घट्यो, किन यी विषयमा प्रश्न उठ्यो, केही पनि नगरेको भए प्रहरीले कसरी पक्राउ गर्‍यो ? केही हो भने त्यसको स्पष्ट जानकारी सम्बन्धित व्यक्तिहरूबाट लिन उहाँहरूलाई पत्राचार गर्ने निर्णय भयो,’ भट्टराईले भन्नुभयो । बैठकमा एन्फा कार्यसमितिका २० मध्ये १२ जना सहभागी थिए । बैठकले अन्तर्राष्ट्रिय फुटबल महासंघ (फिफा) र नेपाल सरकारसँग समन्वय गर्न उपाध्यक्ष दीपक खतिवडाको नेतृत्वमा पाँच सदस्यीय समन्वय समिति पनि गठन गरेको छ । समितिमा उपाध्यक्षद्वय दीर्घबहादुर केसी र विराटजंग शाही तथा सदस्यहरू टिकाराम लामा र मनिष जोशी हुनुहुन्छ । समितिले फिफा, एसियाली फुटबल महासंघ (एएफसी) र नेपाल सरकारबाट एन्फालाई प्राप्त भएका पत्राचार तथा निर्देशनहरूको अध्ययन गरी आवश्यक समन्वय गर्नेछ । एन्फा, फिफा, एएफसी र नेपाल सरकारबीच भौतिक बैठक गराउने प्रक्रिया अघि बढाउने निर्णयसमेत बैठकले गरेको छ । समन्वय समिति गठनबारे जानकारी दिँदै पाण्डेले तीनै पक्षबीच नेपालमै बैठक गराउने आवश्यक प्रक्रिया पूरा भएपछि मात्रै निर्वाचनसम्बन्धी विषयमा निर्णय लिइने बताउनुभयो । ‘फिफा, एएफसी र नेपाल सरकारबीच एन्फाको समन्वयमा फिजिकल बैठक बस्नका लागि के-कति प्रक्रिया पूरा गर्नुपर्छ, ती प्रक्रिया पूरा गराएपछि निर्वाचनको सन्दर्भमा जाने निर्णय भयो,’ उहाँले भन्नुभयो । बैठकले एन्फाको प्रशासनिक काम सञ्चालन तथा पत्राचारका लागि सहायक महासचिव बद्री भट्टराईलाई निमित्त महासचिवको जिम्मेवारी दिने निर्णय गरेको छ । त्यस्तै, फिफा यू-१५ विश्वकप तथा फेस्टिभलमा नेपालको प्रतिनिधित्व गरिरहेका खेलाडीलाई प्रोत्साहन गर्न सरकारसँग पत्राचार गर्ने निर्णय पनि भएको छ । लामो समयदेखि पारिश्रमिक नपाएका खेलाडी, कर्मचारी तथा प्रशिक्षकको पारिश्रमिक भुक्तानीका लागि आवश्यक प्रक्रिया अघि बढाउने निर्णयसमेत बैठकले गरेको भट्टराईले बताउनुभयो । एन्फा विधानको धारा ३१ (२) मा कार्यसमितिका एक तिहाइ वा सोभन्दा बढी सदस्यले लिखित माग गरेमा अनिवार्यरूपमा कार्यसमिति बैठक बोलाउनुपर्ने व्यवस्था छ । सोही व्यवस्थाअनुसार बहुमत सदस्यले बैठकको माग गरे पनि अध्यक्षले बैठक नबोलाएपछि वरिष्ठ उपाध्यक्ष खड्काको नेतृत्वमा बैठक बसेको हो । खेल मिलेमतो तथा ठगीसम्बन्धी कसुरमा मुद्दा परेका अध्यक्ष नेम्बाङ र महासचिव राई जनही पाँच लाख रुपैयाँ धरौटीमा रिहा भएका छन् । त्यस्तै, कोषाध्यक्ष जोशी १५ लाख र लेखापाल पाण्डे १२ लाख रुपैयाँ धरौटीमा छुटेका हुन् । तेस्रो पक्षको हस्तक्षेप भएको भन्दै फिफाले २४ जुनदेखि एन्फालाई निलम्बन गरेको छ । फिफाको निलम्बन, पदाधिकारीमाथि लागेको आरोप र आन्तरिक विवादका कारण एन्फाको प्रशासनिक तथा निर्वाचन प्रक्रिया थप अन्योलमा परेको छ ।