एनफिल्डमा १४ वर्षपछि आर्सनलको जित

लण्डन । युरोपका प्रमुख फुटबल लिगमा आइतबार राती आर्सनल, रियल मड्रिड र युभेन्ट्सले जित निकालेका छन् । इंग्लिस प्रिमियर लिगमा आर्सनलले लिभरपुललाई उसकै मैदानमा पराजित गर्दै शीर्ष स्थान कब्जा गर्दा स्पेनिस ला लिगामा रियल मड्रिडले रेसिङ सान्टान्डरलाई हराएको हो । यता इटालियन सिरी एमा युभेन्ट्सले नापोलीलाई पराजित गरेको छ । इंग्लिस प्रिमियर लिगअन्तर्गत आर्सनलले एनफिल्डमा लिभरपुललाई १-० ले पराजित गर्‍यो । काई हाभर्ट्जले गरेको एकमात्र गोल आर्सनलको जितका लागि पर्याप्त बन्यो । उहाँले खेलको १६औँ मिनेटमा गोल गर्नुभएको थियो । यो जित आर्सनलका लागि विशेष रह्यो । उसले लिभरपुलको घरेलु मैदान एनफिल्डमा १४ वर्षपछि पहिलोपटक जित निकालेको हो । सन् २०१२ यता आर्सनलले एनफिल्डमा लिभरपुललाई हराउन सकेको थिएन । जितसँगै आर्सनलले प्रिमियर लिगको शीर्ष स्थानमा पुनरागमन गरेको छ । उसले दोस्रो स्थानको म्यानचेस्टर सिटीमाथि तीन अंकको अग्रता बनाएको छ । उता स्पेनिस ला लिगामा रियल मड्रिडले रेसिङ सान्टान्डरलाई ३-० ले पराजित गर्दै सबै प्रतियोगितामा लगातार छैटौं जित निकालेको छ । रियलको जितमा किलियन एमबाप्पे, जुड बेलिंघम र यान डियोमान्डेले गोल गर्नुभयो । खेलको ११औँ मिनेटमा पेनाल्टीमार्फत् गोल गर्दै एमबाप्पेले रियललाई अग्रता दिलाउनुभएको थियो । विपक्षी खेलाडीले उहाँलाई फाउल गरेपछि रियलले पेनाल्टी पाएको थियो । पहिलो हाफको मध्यतिर एमबाप्पेको संलग्नतामा बेलिंघमले गोल गर्दै अग्रता दोब्बर बनाउनुभयो । यो रियलका लागि उहाँको ५०औँ गोल थियो । पहिलो हाफ सकिनुअघि डियोमान्डेले तेस्रो गोल थप्नुभयो । यसअघि रियलले बार्सिलोनालाई दुई-एकले पराजित गरेको थियो । पछिल्लो जितपछि रियल तेस्रो स्थानमा छ । ऊ दोस्रो स्थानको एट्लेटिको मड्रिडभन्दा एक अंक र शीर्ष स्थानको बार्सिलोनाभन्दा तीन अंकले पछाडि छ । यसैगरी, इटालियन सिरी एमा युभेन्ट्सले नापोलीलाई २-० ले पराजित गरेको छ । एलिएन्ज मैदानमा ४१ हजार दर्शकसामु भएको खेलमा युभेन्ट्सले दोस्रो हाफमा दुवै गोल गरेको थियो । खेलको ७०औँ मिनेटमा करिम एलाज्बेगोभिकले गोल गर्दै युभेन्ट्सलाई अग्रता दिलाउनुभयो । त्यसपछि खेल सकिन तीन मिनेट बाँकी रहँदा जेरेमी बोगोले दोस्रो गोल थप्दै टोलीको जित सुनिश्चित गर्नुभयो । खेलको ७५औँ मिनेटमा नापोलीका लुका मारिआनुचीले रातो कार्ड पाएपछि टोली १० खेलाडीमा सीमित भएको थियो । लिगमा १० खेल खेलेको युभेन्ट्सको यो पाँचौं जित हो । जितपछि १७ अंक जोडेको युभेन्ट्स सातौं स्थानमा उक्लिएको छ । पराजित नापोली १४ अंकसहित आठौं स्थानमा छ । २८ अंक जोडेको लाजिओ शीर्ष स्थानमा कायम छ । एजेन्सी