एनपीएल खेलाइने पिचप्रति जिम्मीको असन्तुष्टि, भने– ‘१२० रनले पुग्दैन’

काठमाडौं । सिद्धार्थ बैंक नेपाल प्रिमियर लिग (एनपीएल) खेल्न नेपालमा रहेका न्युजिल्यान्डका अलराउन्डर जिम्मी निशमले प्रतियोगितामा प्रयोग भइरहेका पिचप्रति असन्तुष्टि जनाएका छन्। जनकपुर बोल्ट्सबाट खेलिरहेका निशमले सामाजिक सञ्जालमार्फत पिच सुधार गर्नुपर्ने आवश्यकता औँल्याएका हुन्। उनले आफ्नो इन्स्टाग्राममा लेखेका छन्, ‘म नेपाल र एनपीएललाई निकै माया गर्छु। तर यी पिचबारे गम्भीर रूपमा केही गर्न आवश्यक छ। पूरै प्रतियोगिताभरि १२० रन नै जितका लागि पर्याप्त हुने अवस्था हुन सक्दैन।’ निशमको यो टिप्पणीले एनपीएलमा ब्याटिङका लागि पिच अनुकूल नभएको विषयलाई पुनः चर्चामा ल्याएको छ। प्रतियोगिताका पछिल्ला खेलहरूमा कम रन बन्ने क्रम बढ्दै गएपछि पिचको अवस्थामाथि प्रश्न उठ्न थालेको हो। एनपीएलको २५औँ खेलसम्मको तथ्यांकले पनि ब्याटिङमा देखिएको कठिनाइलाई संकेत गर्छ। वर्षाका कारण टसबिनै रद्द भएको एक खेल र पाँच ओभरमा छोट्याइएको अर्को खेललाई हटाउँदा निर्धारित २० ओभरमा खेलिएका २३ खेलका ४६ इनिङ्समा कुल ६ हजार २२७ रन बनेका छन्। यसअनुसार प्रतिइनिङ्स औसत १३५.३७ रन रहेको छ। पहिलो इनिङ्समा औसत १४०.६५ रन बनेको छ भने दोस्रो इनिङ्सको औसत १३०.०९ रन छ। ४६ इनिङ्समध्ये २० इनिङ्समा टोलीले १३० रनसमेत बनाउन सकेका छैनन्। त्यस्तै, नौ इनिङ्समा स्कोर १०० रनभन्दा कम रहेको छ। पछिल्ला पाँच खेलको तथ्यांकले ब्याटिङमा देखिएको समस्या थप स्पष्ट पार्छ। ती पाँच खेलका १० इनिङ्समा कुल १ हजार ११६ रन मात्रै बनेका छन्। अर्थात् प्रतिइनिङ्स औसत १११.६ रन रहेको छ। प्रतियोगितामा २०० रन पार भएको एउटा मात्रै इनिङ्स छ। पोखरा एभेन्जर्सले कर्णाली याक्सविरुद्ध तीन विकेट गुमाएर २१७ रन बनाएको थियो। उक्त खेलमा युवराज सिंह सामराले अविजित १०२ रन बनाएका थिए। पछिल्ला खेलमा लक्ष्य पछ्याउने क्रममा पनि ब्याटिङ कठिन देखिएको छ। ८९ रनको लक्ष्य पछ्याउँदा चितवनले छ विकेट गुमाएको थियो भने १२६ रनको लक्ष्य पछ्याएको काठमाडौंले पूरा २० ओभर खेल्दा पनि जितका लागि आवश्यक रन बनाउन सकेन।